Høskoli siuariartortoq

Sisimiuni Knud Rasmussenip Højskolia uklut marluik qaangiuppata ukiunik 50-inngortorsiussaaq. Nalliuttorsiornissaq sioqqullugu højskoli arlalinnik suliniuteqarpoq.

Suliniuteqatigiit siulittaasoq H.C. Nielsen (assimi) siuttoralugu 2.7.2012-imi højskolip nalliuttorsiornissaata tungaanut Knud Rasmussenip Højskolia nutarterneqassaaq qorsunngorsarneqarlunilu.

Ukiut marluk qaangiuppata Knud Rasmussenip Højskolia ukiunik 50-inngortorsiussaaq, taamaasineranilu atuartut 2000-t sinneqartut Kalaallit Nunaanni inuit højskoliisa kisiartaanni atuarsimassapput.

Tamatumunnga atatillugu højskolip siulersuisuisa Julie Berthelsen illersuisutut atorfinitseqqammerpaat.

Nalliuttorsiornissap tungaanut atuarfik arlalinnik suliniuteqassaaq, ilaatigut atuarfik qorsunngorsarlugu avatangiisinullu mianerinnittunngorsarlugu.

Atuarfik seqernup kissarnganik tigooqqaatinik ikkussuisimavoq, ullumikkut atuarfiup imermik kissartumik atuinerata 85 procentiianik aammalu kiassarnermut allamut atuinerata sisamararterutaanik pilersuisunik. AP Møller Fondenimit tapiiffigineqarluni ilinniartunut angallammik piniutissamik aalisarnermilu atugassamik pisisoqarsimavoq, ilinniartut inaat pitsanngorsarneqarsimapput atuarfiullu IT-mut pilersaarutaa ilisimasalinnit ikiorteqarluni allanneqarsimavoq aallartinneqarsimallunilu.

Aamma ilinniartutigut siuariartortoqarpoq. Sisimiuni Knud Rasmussenip Højskoliani siulittaasoq H.C. Nielsen oqaluttuarpoq misissuinerit kingulliit takutikkaat atuarfimmi 2009-mi ilinniartut 85 procentiisa atuarnermik ingerlassimagaat, 2006-imi 76 procentit ingerlassimagaat.

2006-imiillu 2008-mut atuartunit 100-nit aperineqartunit 95-it akipput affangajaat suliffeqartuusut (45,3 procentit). Pingajorarterutaat piginnaatitaaffilimmik ilinniagaqarput.

- Kalaallini inuiaqatigiinni kisitsisit nalissaqanngillat, taamaasillunilu Kalaallit Nunaata ineriartorneranut nalissaqanngitsumik pingaaruteqarluni. Ajoraluartumik atuarfik aningaasaqarniarnikkut ima tatineqartigaaq holdimi tullermi atuartut 20-iinnaassallutik, tassa pisarnermit affaannanngortillugit qinnuteqarsimasunillu 265-init ikinnerujussuullutik, H.C. Hansen oqarpoq, taassumalu neriuutigaa ineriartorneq ilorraap tungaanut saakkumaartoq.

- 3. juli 2012-imi Sisimiuni nutaaliaasumik mingutsitsinngitsumillu højskoleqarutta inuppassuit tamatumunnga qutsavigisassaapput. Siullerpaamilli ingerlatsinermik piumassuseqartitsivoq inuusuttut isaanni qaamaneq takullugu inuunerminnillu ingerlatitseqqinnerat malinnaaffigalugu, H.C. Hansen oqarpoq.

Atuarfiup oqaluttuarisaanerani alloriarnissaq tulleq tassaavoq inunnik arlalinnik tapersersortitut, tassa atuarfimmut ambassadøritut attuumassuteqalersitsineq. Atuarfimmik ineriartortitseqataanissamut manna tikillugu akuersereersimapput Henrik Byager, Uffe Ellemann-Jensen, Michael Binzer, Poul Dissing aamma Poul Nesgaard.

Powered by Labrador CMS