Pinngortitami assillammak nunatsinni assilisaavoq

Ukallit angutivissat nuliunerup nalaani arnavialerngusaallutik assingat ukioq manna pinngortitami assilisatut torrallataanerpaatut toqqarneqarpoq.

Naliliisut tunngavilersuinerminni tikkuarpaat assi pissanganartorsiornermik imaqartoq kusanartumik qaamaneqarluni, allanillu akornusersuutaasinnaasunik imaqarani. Upernaap seqerna pukkilisimasoq saallugu ukallit 'isimittaattut' kuultimik qaamaneqartumik avatangiiseqarput. Assi: Morten Hilmer

Assiliilluni unamminermi taaguuteqartumi 'Skyd på naturen' (Pinngortitaq assiliuk) Naturamami naliliisussat nalornissuteqanngillat. Assiliisartunit 109-usunit assit nassiunneqartut 500-t akornanni Morten Hilmerip assilisaa unamminermi qulequttani sisamaasuni tamani pitsaanerpaatut nalilerneqarpoq.

Morten Hilmer akissarsitinneqarpoq Limpopo Travelimik 20.000 koruuninik naleqartumik angalanissaminut.

Assi nunatta avannamut kangiani 2008-imi assilisaavoq. Morten Hilmer qaammatini pingasuni silasiorfimmi sulivoq. Sunngiffimmini assiliissutilerluni qaqqani angalaartarpoq. Sumiiffimmi tassani sila unammilligassaasarpoq. Isserujussuarnera, ilaatigut - 30-nik issittumi, sivisumik issianissaq ajornartarpoq.

Morten Hilmerip ukallit pissusaat sivisuumik malittarisimavaa, ilisimalersimallugulu sumi qanorlu ilisukkut nassaarisinnaallugit. Seqineq pukkitsumiittoq saallugu inissittarpoq taamaalilluni assilisai pissanganartumik qaamaneqartarlutik. Pallorluni ukaleq assilitillugu alla aggersoq takuaa. Morten neriuppoq ukallit akornanni arlaanik pisoqassasoq, assiliissutinilu sukkanerusumik assiliinissaanut inissillugu.

Seqineq tarrippoq qaamanerlu sakkukillilluni. Assaasa isigaasalu inuai nillertippallaarput, pisoqariataarporlu. Ukallip aappaata aappani saassuteriasaarpaa, Mortenimiillu 30 meterinit qaninnerusumi ungasitsigisumi kamaattunnguaqarpoq. Sekundialuit qaangiummata uneqqipput, taamaattorli Morten Hilmerip assilisani ajugaassutissani pissarsiaralugu, politiken.dk allappoq.

Mortenip assilisai Danmarkimi sumiiffinni arlaqartuni saqqummersinneqarsimapput, maannakkullu Londonimi National History Museumimi assilisaasa ilaat takuneqarsinnaavoq.

Morten Hilmer 2006-imi 2009-milu Danmarkimi pingortitami assiliillammattut toqqarneqarpoq.

Powered by Labrador CMS