Nanortalimmi tikeraarneq angusaqarfiulluartoq
Kommune Kujallermi borgmesteri Simon Simonsen aningaakilliortoqaraluartoq isumalluarpoq.
- Kommunimi Naalakkersuisunilu 2010-mi aningaasaqarneq ilungersunartutut isikkorpoq. Aningaasatigut sukangasuumik aqutsinermut takussutissaapput aningasaliinerit ikittuinnaammata, nuannaarutigisinnaavarpulli ukioq manna Nanortalimmi atuarfiliornissaq aallartinneqassammat, neriupugullu tamanna suliffissaaleqisunut amerlavallaanut suliffissanik pilersitsiumaartoq.
Kommunimi nuannaarutigaarput, guultisiorfik aallarteqqissammat, atornitsitsinerillu siulliit isumannaareerput. Naak aningaasatigut sukangasuumik aqutsineq ingerlanneqartussaasoq aamma pisariaqarpoq maani inuussutissarsiornerup iluani susassaqartullu suleqatigiilluta eqqartussallugu, qanoq iliornikkut peqatigiilluta kommuni ineriartortissinnaanerlutigu, taamaalilluni nugassaqqissuulluni suliffeqarfinnillu pilersitsiffiusinnaalluni.
Taama oqarpoq borgmesteri Simon Simonsen atorfilittat sumiiffimmilu Inatsisartunut ilaasortaq Deborah Kleist Nanortalimmeersoq peqatigalugu Nanortalimmut tikeraareerlutik, suliffeqarfiit, sumiiffinni inuussutissarsiuteqartut, aalisartut piniartut Nanortalimmiittut pulaartarlugit.
- Aalisartut piniartullu pitsaasumik aamma ataatsimeeqatigaavut, kommunimiit pikkorissarnissamik kissaatigisaat ammaffigalutigik. Ataatsimiinnermi tassani nuannaarutigineqarpoq nunaqarfinni tunitsiviit matuneqarsimasut ilaat marlussuit ammaqqinneqarsimammata.
- Aamma pitsanngorsaanissamut kissaatit arlallit saqqummiunneqarput, soorlu umiatsiaararsortut tulattarfissaa puttasuliaq, takornariaqarnerup iluani siunnersuutit, aningaasat ikikkaluartut naammassisinnaasagut, borgmesteri naggasiivoq.