Julie erinarsortussanik pissarsiorpoq

Ukiup pingajussaa TV2-mi aallakaatitassiaq Allstars pinnguarnissamut erinarsoqatigiinnissamullu piariissaaq, aliikkusersuillunilu aallakaatitassiami erinarsoqatigiinnik aqutsisussat sisamat nutaat saqqummiunneqarput.

Julie Berthelsen ulluni makkunani ulapputissaqaqaaq. Assi: ørgen Chemnitz

Allstars pingajussaa aallakaatinneqalerpat nalaarsaarfimmi inissilluarnissaq nipiliuutillu kissassernissaat piffissanngussaaq. Nipilersornermik aqutsisussat sisamat nalunaarutigineqaqqammerput, ukioq mannalu tassaapput Julie Berthelsen, Rasmus Nøhr, Niarn aamma Johnson. Aallakaatitassiami hiphopeqarnissaa ilimanarsivoq.

Nunap immikkoortuanut aggerfimminut erinarsoqatigiinnik aqutsoq qukalleersisuussaaq, tamarmillu erinarsoqatigiittussanik 20-usunik katersissapput. Tassalu Rasmus Nøhr Københavnip qeqqaniit erinarsortissaminik pissarsiussaaq, Niarn Jomfru Ane Gademi pissarsiorluni, imaluunniit Aalborgimi, Johnsonilu Århusimi piukkunnartussarsiussalluni.

Naluneqanngitsutut Julie Berthelsen Kalaallit Nunaanneersuuvoq, taamaattumik periarfissaqassaaq Nuummi Københavnimilu erinarsortussarsiorneranut ornigunnissaq, kikkullu tamarmik Kalaallit Nunaannut attuumassuteqartut Juliep gruppianut tikilluaqqusaapput, tv2.dk allappoq.

Allstarsimi maannakkut ingerlanneqartussami nutaartaassaaq, erinarsoqatigiinnik aqutsisut gruppiminni kisimiillutik erinarsorsinnaasunik marlunnik toqqaanissaat, taakkulu siuttuutinneqarlutik. Taamaalilluni periarfissaq nutaaq ilanngunneqarpoq, tassaalerlutillu erinarsoqatigiinnik aqutsisoq, erinarsoqatigiit kiisalu kisimiillutik erinarsortussat, taakkulu isiginnaartut sms-erlutik taasineranni toqqarneqassapput.

Erinarsoqatigiinni erinarsortussanik nutaanik pissarsiorneq februarimi aallartissaaq, illoqarfinni pineqartuni ammasumik erinarsortussarsiorneq ingerlanneqassalluni.

Powered by Labrador CMS