Julie ikiuiniutimik nuusioqataavoq
Nunap sajunneratigut eqqugaasut qallunaat kalaallillu eqqumiitsuliortuinit ikiorneqassapput. Tamanna pissaaq erinarsuut 'Skrøbeligt Fundament' (Tunngavik qajannartoq) aqqutigalugu.
Julie Berthelsen ikiuiniarluni CD-liami 'Skrøbeligt Fundamentimi', Sys Bjerremit Søren Mikkelsenimillu suliarineqartumi erinarsoqataavoq. Nuusiaq tuaviuullugu suliaavoq, sinneqartoorutillu tamakkiisut Haitimi nunap sajuuneratigut eqqugaasunut tunniunneqassallutik.
Ekstra Bladetimut ima oqarpoq:
- Takullugu soriarsinnaanngitsutut misiginarpoq. Sumi tamani periarfissaqartilluni ikiuuttariaqarpoq, Julie oqarpoq.
- Erinarsuut erinaalu nuannersuuvoq. Taallaqarpoq erinaqarlunilu tiguartinnartumik, taamaattumik soorunami neiruppunga nuannarineqarluassasoq, aningaasarpassuarnillu isertitsissutaalluni.
Qallunaat erinarsortartorpassui erinarsuummi suliarinasuakkami erinarsoqataasut ataasinngorpat radioqarfinni erinarsorniartussat ilaatigut makkuupput: Lina Rafn, Marie Askehave, Basim, Peter aamma June Belli, Breum, Laura Bro, Nicholas Bro, Sarah-Sofie Boussnina, Medina, Nikolaj Coster Waldau aamma Nukaaka, Mille Dinesen, Signe Egeholm, Iben Hjejle, Jooks, Simon Juul, Mia Lyhne, Cyron Melville, Bryan Rice, Thomas Villum aamma Lisbeth Østergaard.
'Skrøbeligt Fundament' ataasinngorpamiit radioqarfinni atorneqaleriissaaq. Erinarsuut atorneqassaaq DR1-mi Danmarkimi katersuiniarnermut arfininngorpat ingerlanneqartussamut atatillugu, kingornalu internetsikkut aaneqarsinnaalluni tuniniarneqassalluni.