Nikolaj Heinrich ataqqinaammik ilaasortanngortinneqartoq
Kommunalbestyrelsemi ilaasortaq borgmesteriusimasorlu Nikolaj Heinrich World Winter Citiesimi ataqqinaammik ilaasortanngortinneqarpoq.
World Winter Citiesimi borgmesterit ataatsimeersuarnerannut Estlandimi ulluni makkunani ingerlanneqartumut atatillugu Nuup Kommunerisimasaani borgmesteriusimasoq Nikolaj Heinrich Kommuneqarfik Sermersooq sinnerlugu peqataasoq, ataqqinaammik ilaasortanngortinneqarpoq, taama allappoq sermersooq.gl.
- Ukiorpassuarni naalakkersuinermik suliaqarsimalluni takullugu nuannerpoq, ukiut ingerlanerini suliarisimasat ulluinnarnilu eqqarsaatigineqangaarneq ajortut, maluginiarneqarlutillu ataqqiniarneqarnerat, taama oqarpoq borgmesteriusimasoq, Kommuneqarfillu Sermersuumi kommunalbestyrelsimi ilaasortaq, maannakkullu World Winter Citiesimi ataqqinaammik ilaasortanngortinneqarpoq Nikolaj Heinrich.
Ataqqinaammik ilaasortanngortitsinermi ilaatigut tunngavilersuutigineqarpoq, World Winter Cities 2008-imi ataatsimeersuarnerata Nuup Kommunerisimasaata aaqqissugaata iluatsilluartumik ingerlanerani Nikolaj Heinrich siuttuusimasoq. Ukiuni 30-ni kingulerni ataatsimeersuartarnerni pitsaanerpaamik ingerlanneqarsimasutut nalilerneqarpoq, imarisamigut pilersaarusiorneqarnermigullu, kiisalu pilersaarusiornermut atatillugu kattuffimmi World Winter Citiesimi anguniagassanik siunniussaqartoqarsimammat.
Nikolaj Heinrichip saniatigut ilaasortat marluk aamma ataqqinaammik ilaasortanngortinneqarput.