Thomas Nicolajsen: Ajorpoq
Pineqaatissinneqartunut inissiisarfimmut inissinneqarsimasut inatsisit malillugit pineqartannginnerat Pinerluuteqarsimasunut Nakkutilliisoqarfimmi pisortap naammaginngilaa.
- Inissinneqarsimasoq nakorsiartinneqarsinnaanngimmat, naak tamanna pisariaqartinneqartoq uppernarsarneqarsimasoq, ajorpoq, Thomas Nicolajsen oqarpoq.
Inissinneqarsimasut tallimat missaat inatsisit malillugu eqqunngitsumik pineqartarnertik pillugu oqaluttuartut AG-p normuani kingullermi atuarneqarsinnaavoq. Ilaat kingornuttakkamik toqqutaasinnaasumik nappaateqarpoq, taamalu sisamariarluni ukiumut nakorsamit misissorneqartussaalluni. Inissinneqartulli saaffiginnissutigisartagai inissiisarfimmi sulisut soqutiginngitsuusaartuarsimavaat, nakorsiarnissallu piviusungortinnissaa ulapputigissanagu.
- Inissinneqarsimasoq nakorsamit soorunami misissorneqartariaqarpoq. Suliarli erseqqissumik ilisimasaqarfiginngilara, naammagittaalliummillu tigusaqarsimananga, Thomas Nicolajsen nassuiaavoq.
Inissinneqarsimasunik apersuineq ullunik marlussunnik qaangiuttoq pineqartoq nakorsamit suli misissortissimanngilaq.
Sinnera AG-mi ullumi atuaruk.