Nukimmik atuinerit misissoruk
Nukissiorfiit februaarip aallaqqaataani nittartakkakkut atortorissaarut atulissavaat, internet aqqutigalugu atuisut nukimmik atuinertik malinnaavisiginnaalerlugu.
Atuinermut uuttuutimik ungasianiit nalunaarsorneqarsinnaasumik ikkussiffigineqarneqarsimagaani februaarip aallaqaataani atuisutut Nukissiorfiit nittartagaat aqqutigalugu toqqaannartumik atuineq misissorneqarsinnaalerluni, nukissiorfiit.gl allappoq.
NIttartagaq aqqutigalugu atortorissaarut nutaaq atorlugu atuisup atuinini malinnaavigisinnaalissavaa, akunnikkaartumik. Taamaalilluni atuisup takusinnaalissavaa, nioqqutissat innaallagissamik ingerlasut atuinerat, pisariaqanngitsumillu nukimmik atuinerit ileqqullu naapertuutinngitsut takusinnaalerlugit.
- Ungasianiit nalunaarsuissutit atuisunut Nukissiorfinnullu iluaqutaapput. Atuisup nammineq ileqqunik allanngortitsinerit misilittarsinnaavai, internetsikkullu ingerlaannaq takullugu iliuuseriniakkat qanoq sunniuteqarnersut. Nukkissiorfimmut iluaqutaa tassaavoq, uuttuutinik ataasiakkaanik nalunaarsuiartortarunnaarneq, nukissiuuteqarnermut pisortaq Svend Hardenberg oqarpoq.
Ungaianiit uuttuutinik nalunaarsuutit atorlugit aamma periarfissaqalerpoq akiliisoqarsimatinnagu matusinissaq ammaaqqinnissarlu. Taamaaliornikkut Nukissiorfiit matusinermut ammaaqqinnermullu akilut annikillisinnaavaat, tamannalu atuisunut sipaarnermik aamma kinguneqarpoq.
- Atortorissaarut sakkuuvoq atuisumut aningaasanik sipaartitsillunilu silap pissusaanut akisussaaqataanitsinni kivitseqataasoq, Svend Hardenberg oqarpoq.
Nittartagaq aqqutigalugu nukimmik atuinermut misiliinissamut pisariaqarpoq nutaamik uuttuummik ungasianiit nalunaarsorneqarsinnaasumik ikkussivigineqarsimanissaq. Uttuutinik taarseruineq Nukissiorfimmit 2007-imi aallartinneqarpoq, naatsorsuutigineqarporlu atuisut tamarmik nutaamik uuttuutilerneqarsimanissaat kingusinnerpaamik 2012-imi.
Uuttuutit tamarmik affangajaat, 47 procentit, nutaamik taarserneqarsimalerput. Uuttuutit nutaat Nuummi, Sisimiuni, Uummannami Upernavimmi taakkulu nunaqarfiini ikkunneqarsimapput.
2010 naatinnagu Nukissiorfiit naatsorsuutigaat, Narsami, Qaqortumi, Nanortalimmi, Paamiuni Illoqqortuumiunilu taakkulu nunaqarfiini uuttuutit tamarmik taarserneqarsimanissaat. Taakkulu tassaapput nuna tamakkerlugu uuttuutit tamarmik 66 procentii.