Atortittartuunerua?
Atoqatigiitsinneq inuusuttut ilaannut sikaritsinut, hashimut, aningaasanut ineqarnissamullu aqqutissaavoq. Apeqqutaavoq tamanna atortittartuunerunersoq.
Nunami ulloq unnuarlu paaqqinnittarfiit aperigaanni atortittartuuneq inuusuttut akornanni takornartaanngilaq.
– Meeqqanik inuusuttunillu arlalinnik paaqqinnittarfinniittuuteqarpugut atortittartunik. Nalunngilarput akikitsuaqqamik aanngajaarniutinillu akilersillutik imminnut tuniniartartut, Fie Hansen, ’Tulararfimmi’, ulloq unnuarlu paaqqinnittarfiit peqatigiiffianni, siulittaasoq ukiunilu kingullerni qulini Nuummi ulloq unnuarlu paaqqinnittarfimmi pisortaasoq, oqarpoq.
Tarnip pissusiinik ilisimatuup Conni Gregersenip paasisinnaalluarpaa ulloq unnuarlu paaqqinnittarfiit tamanna atortittartuunermik taammassuk, taassuminngali isigalugu tassaaneruvoq killissamik paatsiveerulluni pissusilersorneq, atortittartuunivittut taaneqarsinnaanngitsoq.
– Atortittartuuneq paasivara tassaasoq akiliutissamik siumut isumaqatigiissuteqareerluni atoqatigiinneq, isumaqarpungalu taamaasiortoqarneq ajortoq, Conni Gregersen oqarpoq, taannalu isumaqarpoq inuiaqatigiit oqaaseq nassuiartariaqaraat.
ATUARUK: Atortittarneq pillugu oqallinnissaq kissaatigineqarpoq
Sermitsiaq nr. 4 atuaruk