Grønlandseksperten akiliisinnaajunnaarpoq

Angalatitsivik Grønlandseksperten 2004-mi pilersinneqarpoq, Kangerlussuaq Tourismimiillu sapaatip akunnerani kingullermi akiliisinnaajunnaartumit pigineqarluni.

Grønlandsekspertenip akiliisinnaajunnaarneratigut angalasut aqqaneq marluk angalasinnaajunnaarput. Assi: Leiff Josefsen.

Angalatitsvik Grønlandseksperten Københavnimeersoq akiliisinnaajunnaartutut nalunaarutigineqarpoq. Tamanna pivoq imarsiornermut niuernermullu eqqatuussivimmi Københavnimiittumi, nutaarsiassaqartitsivik Take Off allappoq.

Angalatitsivik Kangerlussuaq Tourismimik pigineqarpoq, taannalu sapaatip akunnerani kingullermi akiliisinnaajunnaarpoq.

Angalanissamut qularnaveeqqusiinermut aningaasaateqarfik nalunaarpoq Grønlandseksperten akiliisinnaajunnaarmat angalaniartunik inniminniisoqarsimanngitsoq. Januaarilli 28-ani angalasut aqqaneq marluk nunatsinnukartussaagaluarput. Akiliisinnaajunnaartoqarneratigut angalasinnaajunnaarput.

Angalanissamut qularnaveeqqusiinermut aningaasaateqarfik angalaniartunut taarsiisarpoq, kiisalu akiliisinnaajunnaartoqartillugu ataatsimoorussamik angalanissamik timmisartumullu bilitsinik pisisimasunut taarsiisarluni.

Powered by Labrador CMS