Nunavut-mi aamma katersuiniarput

Iqaluit-mi nipilersortartut eqqumiitsuliortullu Haitimi eqqugaasunut aningaasanik katersuiniarput.

Ass.: Polfoto/ Beth Duff-Brown

Iqaluit-mi nipilersortartut eqqumiitsuliortullu aamma suliniuteqarput Haitimi nunap sajunneranik eqqugaasunut aningaasanik katersuiniarlutik.

Arfininngormat unnukkut illoqarfimmi neriniartarfinni imerniartarfinnilu pingasuni aliikkusersuisoqarpoq, tamakkunani nipilersortartut eqqumiitsuliortullu allat akeqanngitsumik aliikkusersuillutik haitimiut ikiorniarlugit, taamatut allappoq Nunatsiaq News.

Nalunaaqutaq 23.30 neriniartarfimmi Elks-imi naggataartoqassaaq, tassani eqqumiitsuliortut amerlanerpaat peqataassallutik. Naggataamik aliikkusersuineq immiunneqassaaq iTunes-imullu ilineqassalluni.

Aamma Nunavut Arctic Collegemi Fine Arts-imi eqqumiitsuliornermik ilinniartut katersuiniaqataallutik eqqumiitsulianik tuniniaassapput.

Powered by Labrador CMS