Ilulissat erngup nukissiorfittaalerput
Naalakkersuisut tallimanngornermi akueraat Ilulissani imermik nukissiorfiliortoqassasoq.
Naalakkersuisut akuersaarpaat Ilulissat avannannguanni, kangerlummi Paakitsumi erngup nukinganik nukissiorfiliortoqassasoq, inatsisartullu aningaasaqarnermut ataatsimiitsitaliaanut innersuussutigaat kikkut sanassaneraat.
KNR taama tusagassiivoq.
Ilulissani erngup nukinganik nukissiorfissaq siullerpaajulluni pingasunik turbinelerneqareerluni sananeqassaaq. Taamatut sananissaq akikinnerussaaq, pisariaqartinneqalerpat turibinit pingajuat atoriaannaassammat. Nuummi turbinit pingajuata ikkunneqarnera akitsorsaataasimaqaaq.
2013-imi ukiakkumiit inissiat ungasianiit kiassaateqarfimmit kiassarneqartut erngup nukinganeersumik kiassarneqalissapput. Taamaasilluni CO2 aniatinneqartoq annikillisarniarneqarpoq.
Nukissiorfik naammassippat nunatsinni inuiaqatigiit pisariaqartitaasa 70 procentiat nukimmik piujuartumik mingutsitsinngitsumillu pilersorneqalissaaq.
Aningaasaqarnermut ataatsimiitsitaliap pisoq januaarip 27-anni ataatsimiissutigissavaa.