Qaartartunik paasissutissat isertuunneqarput

Amerikamiut timmisartuat 1968-imi Pituffiup eqqaani nakkartoq pillugu uppernarsaatit Amerikami pisortaniit saqqummiunneqarput. Uppernarsaatilli amigaateqarput.

Thulemi sakkutooqarfimmi Amerikamiut timmisartuutaasa qaartartumeerisartut B52-it ilaat 1968-imi assilineqarsimasoq Assi: Polfoto/Ingolf Kraft-Christensen

1968-imi Pituffiup eqqaani timmisartup nakkarneraniit paasissutissat maannamut isertugaasimasut Amerikami pisortaniiit saqqummiunneqarput.

Uppernarsaatilli amigaateqarput, tamannalu kalaallit Folketingimi ilaasortaatitaata Lars-Emil Johansenip pasinartoqarsoraa, knr.gl allappoq.

Amerikamiut timmisartuutaat qaartartunik nakkaatitsisartoq Pituffiup eqqaani nakkarpoq, taamanikkulli ilisimatuut kalaallillu eqqartulerpaat, ajutoorneq Qaanaap eqqaani qinngornernik ulorianartunik mingutsitsinermillu peqqissutsimut ulorianartumik pilersitsisimasinnaanersoq. Ilaatigut kalaallit naalakkersuisuisa qallunaat naalakkersuisui qinnuigaat tamakkiisumik paasitinneqarnissaq siunertaralugu Amerikami pisortat attavigeqqullugit. Paasissutissalli tunniunneqartartut amigaateqarput.

- Uppernarsaatit ilaat saqqummiunneqarput, ilaalli qernertumik titartorneqarsimapput, suna allanneqarsimanersoq takuneqarsinnaanani, Folketingimut ilaasortaq Lars-Emil Johansen KNR-imut allappoq.

Ernummatigaa pingaarutilinnik paasissutissaqartoq Amerikamiut isertuunniagaannik.

- Asuli eqqoriaaqattaassaagut. Isumaqarpungali piviusorsiornerusoq naatsorsuutigissallugu uppernarsaatit suli saqqummiunneqanngitsut uuttortaanernik timmisartullu nakkariitsiarnerani apummik mingussimasumik timmisartullu aseqqukuinik saliisut misissorneqarnerannik ilaatigut imaqarsinnaasut.

Lars-Emil Johansenip Folketingimi Kalaallit Nunaat pillugu ataatsimiititaliami ataatsimiinnissami tullermi ernummatini saqqummiunniarpai, neriupporlu suliami suut tamaasa qulaajarnissaat siunertaralugu qallunaat naalakkersuisui Amerikami pisortanut attaveqassasut.

Aalajangerneqareerpoq ukiup massuma ingerlanerani Qaanaami innuttaasut peqqissusaannik misissuineq ingerlanneqassasoq. Peqqissutsimut naalakkersuisoqarfik Danmarkimi peqqinnissaqarfik misissuinermik ingerlatsissapput.

Powered by Labrador CMS