Qimussit aqqutaat navianarput
Nutartigaq: Qaasuitsup Kommuniata Ilulissani qimussit aqqutaasigoornissaq mianersoqqussutigaa aputeqanngippallaarnera pissutigalugu illerngit navianarsisimammata.
Ilulissat eqqaanni qimussit aqqutaasa qimussinik angallafigineqannginnissaat Qaasuitsup Kommuniata innersuussutigaa, apereerpallu aatsaat atoqqinneqarnissaat innersuussutigalugu.
Ulluni siuliini siallerlunilu imaliliorsimavoq, taamaattumillu qimussit aqqutaat sermiinnanngorsimallutik.
Qimussit aqqutaat maanna ima sermiutigaaq ajutoornissamut qanippallaartutut nalilerneqarluni.
Kommunip nalunaarutigaa maskiina apummik katersueriarluni allamut nuussinermi atorneqartartoq atorsinnaanngitsoq aputikippallaarmat sermiuallaarlunilu.
Nunatsinni pissutsit taamaannerat Danmarkimi aviisit assut soqutigaat. Tassami Danmarkimi apisorujussuuvoq, angallattullu mianersoqquneqartarput aputeqarpallaaqimmat.
Aviisit arlallit tekst-tv-llu sermitsiaq.ag knr.gl-ilu Ilulissani pissutsit pillugit ataasinngornermi unnukkut issuarpaat.
TV2-p nutaarsiassaqartitsivik AFP ima issuarpaa:
- Soorlu nunarsuup ilaani sumiiffiit ilaat issittorujussuusut, nunarsuup ilaani nalinginnaanngitsumik kiappoq, tassami anorit kissartut nunarsuup ilaanut taamaalinerani piffigisanngisaminnut ingerlaarmata, Barry Gromett Storbritanniap silasiorfianeersoq oqarpoq.