Angerlarsimaffeqanngitsorpassuit juullisiortinneqarput
Inuit 70-it Nuummi angerlarsimaffeqanngitsunut kisimiittunullu juullimi aaqqissuussinermi peqataapput.
Taamaattumik siornarnamut sanilliullugu marloriaatingajaat peqataapput, 2008-mi 40-t peqataammata.
- Naatsorsuutigisatsinnit amerlanerit ornigupput. Suli amerlanerusunik nerriviliortariaqarsimavugut. Tassalu naatsiiat nungullutik, kisianni qujanartumik neqeqarpoq naammattumik, Morten Christensen, Nuummi angerlarsimaffeqanngitsunut kisimiittunullu ukiut tamaasa juulisiortitsisartuneersoq oqaluttuarpoq.
Nerisassanut ilaapput puulukip neqaa siataq, qeerlutooq siataq aamma medisterpølse. Nerisassallu Pisiffimmit aamma KK Engrosimit tunissutigineqarput, Nerisarfiullu igavai. Tamakkerlugu unnummi taamatut aaqqissuussinermi aningaasartuutit katillugit 15.000 koruuniupput.
Juullimi tunissutit - qarlippaat - Yamatekimit, Røde Korsimit, Ittu.Net-imit aamma peqatigiiffimmit tunissutaapput.
Katillugit namminneq kajumissuseqarlutik suleqataapput inuit aqqaneq-marluk, aaqqissuussineq ingerlanneqarpoq decembarip 24-anni ualikkut Atuarfik Samuel Kleinschmidtimi Nuup qeqqaniittumi.
Peqatigiiffiup angerlarsimaffeqanngitsunut juullimi aaqqissuussinera tamanna sisamassaraat, ukiullu aappassaannik aamma kisimiittut aaqqissuussinermut qaaqquneqarsimapput.
- Nalilerpara affaat kisimiittusut affaallu angerlarsimaffeqanngitsuusut. Nalileruminaatsipparali taamak amerlatigisut peqataaneranni illoqarfimmi angerlarsimaffeqanngitsut amerlisimanerannik tamanna takutitsinersoq, Morten Christensen oqarpoq.