Namminersorneq - pisimasoq arajutsisaq
Ukiut nikilernerat nalilersuiffiuvoq. Tusagassiorfiit tamarmik ukiup ingerlanerani pisimasunik annertunernik oqaluttuarinnittarput. Kisianni Kalaallit Nunaata namminersulernera TV2-mi sumut piva, Peter Alaufesen Jyllandspostenimi atuartartut aperivoq.
- 21. juuni Kalaallit Nunaat namminersulerpoq, Kalaallit Nunaanni pisut annersaattut pingaarnersaattullu taaneqarsinnaagunartoq.
Peter Alaufesen Jyllandspostenimi atuartartutut taamatut allaaserisaqarpoq, TV2-lu isornartorsiorlugu tassani decembarip 28-ani ukiup qaangiutilersup ingerlanerani pisimasut pingaanerit aallakaatitassiarineqarmata.
- Paasiuminaassinnaavoq aallakaatitarsiorfiup inuiaqatigiinnik kiffartuusisuusup tamanna arajutsisinnaammagu, Peter Alaufesen allappoq, nangillunilu:
...aliikkutassaqartitsiniarneq pitsaassutsimik pingaarninngortinneqaraangat, ataatsimullu oqariartuutiginiakkat aninnikinnerpaanngoraangata taava tamatuma inernera ajorluinnartarpoq. Aallakaatitassiallu naanerani quiasaarisoqarujoq, Esben Pretzmann kunngissaq Frederik issuartuusaarlugu oqartinneqarpoq: »Kalaallinit innuttaasunit inuulluaqqutissavassi, Krangalusuaq, Qulusuak, aamma taakku Christianshavnimiittut«. Tamanna tissinanngilaq isumassaaleqinermillu tunngaveqarluni, kiisalu uanga isumaqarpunga TV2-mit kalaallit inuttaasut pillugit avissaartuutsiniartuarneq ingerlanneqartoq, kiisalu qangali ileqqoq qatsunnarsereersoq uteqattaartuarlugu pisoqartoq.
TV2-mit Kalaallit Nunaannukarnissaq eqiagineqanngikkuni, taava nuna takornagassaat tassaavoq imigassamik ajornartorsiornermik aqutsiffiulersimasoq, innuttaasut inuttut ajornartorsiutaasut qaangingaatsiarlugit inuit tulluusimaartut qanilaartut takussavaat, tamakku uagut Kalaallit Nunaannit takutikkusuppavut. Uanga qilanaarpunga TV2-p 2010 aallakaatitassiamik taamaattumik takutitaqarnissaanut... issuaaneq naavoq.