Takornariartaatit ilulissanit ulorianartorsiortinneqarput

Kangilinnguani sakkutuut naalagaasa ersissutigaat nunatta kangerluini iluliaqarluartuni umiarsuarnik takornariartaatinik ajunaartoqarsinnaanera.

Taamaattumik sakkutooqarfik aalajangerpoq atlantikup avannaani umiarsuaatimi annersaat marlussuit aasaanerani umiarsuarnik takornariartaatinik takornariartarfinnut inissittarniarlugit. Taamatut allappoq Politiken.

- Issittup imartaani Nunap Isuaniit Qalasersuarmut annaassiniarneq akisussaaffigaarput. Imartaq tamanna annertoorujussuuvoq, kontreadmiral Henrik Kudsk, Kangilinnguani pisortaasoq, oqarpoq.

- Sikuiuitsumi Kujallermit misilittakkat takutippaat umiarsuarmik takornariartaammik annaassiniassagaanni umiarsuaq takornariartaat alla atornqartariaqartoq - umiarsuit allat taamatut amerlatigisunik ilaasoqarsinnaanngillat. Taamaattumik umiarsuaatileqatigiiffiit aamma inappavut suleqatigeeqqullugit marlukkaarlutillu angalasaqqullugit, nunatta kangerluini angalagaangamik.

- Apeqqutaanngilaq ajutoortoqassanersoq apeqqutaallunili qaqugu tamanna pissanersoq, kommandørkaptajn Jan Bøgsted oqarpoq, taannalu Kangilinnguanit annaassiniarnissamik aaqqissuusseqataassaaq umiarsuarmik takornariartaammik umiiartoqassagaluarpat.

Ukioq manna aggustimi ullormi ataasiinnarmi umiarsuit takornariartaatit assigiinngitsut 14-it nunatsinniipput, Kitaani Tunumilu. Umiarsuit tamakkua, Europami Caribiamilu takornarianik angallassisussatut sanaat, ataasiinnarmik qaleriiunngitsunik timitaqarput.

Jan Bøgstedip oqarnera naapertorlugu umiarsuit arlallit ilulissat akornanni angalasussatut naleqqussarneqanngilluinnarsimapput. Naammattumik sanngissuseqanngillat angallatinillu annanniutinik ammasuinnarnik peqarlutik.

Issittumi umiartornermi piumasaqaateqartoqanngilaq. Umiarsuit takornariartaatit piumasaminnik iliorsinnaapput.

Piumasaqaateqartoqannginnera malittarisassaqannginneralu pissutigalugit sakkutooqarfik umiarsuarnut taamaallaat siunnersuisinnaavoq, kontreadmiral Henrik Kudsk oqarpoq.