Ilinniartut isumalluarput
Danmarkimi Kalaallit Ilinniagaqartut Kattuaffiata Avalaap nuannaarutigaa Kalaallit Nunaata avataani ilinniartunut bussinut qimuttuitsunullu kortinut tapiissuteqartarnermut atuutilersitseqqinnissaq Naalakkersuisut isumaliuutiginiarmassuk.
Isumaliutaasoq piviusunngortinneqassappat ilinniartumut tamanna aningaasatigut oqilisaataangaatsiartussaavoq, tassami ilinniartup Københavnimi najugallip Roskilde Universitetimilu ilinniartup, ilinniagaqarnersiutimi 4.500 kr.-iusut 20 procentii sinnerlugit qaammammut bussinut qimuttuitsunullu aningaasartuutigisarpai, Avalak allappoq.
- Naalakkersuisut Kalaallit Nunaata avataani ilinniartunut bussinut qimuttuitsunullu kortinut tapiissuteqartarnermik atuutilersitseqqissappata, qineqqusaarnermi neriorsuutaasunik piviusunngortitsinissamut alloriarnerusussaassaaq, tassami neriorsuutaasa annersaat tassaammat ilinniagaqarnermik ilinniartitsinermillu qitiusumik suliniuteqarnissaq, Avalak allappoq.
Angallannermut tapiissutit aningaasanut inatsimmi sipaarutigineqartut 54.000 kr.-iupput.
Avalammi isumaqatiginninniartartoq Gerth P. Olsen januaarimi Nuummukassaaq, ilinniagaqarnersiutit pillugit isumasioqatigiinnermi peqataajartussalluni. Isumasioqatigiinermi ilaatigut uku qaqinneqarumaarput; ilinniartunut oorinik taarsigassarsiniarnissamut periarfissat pitsaanerusut taavalu ilinniartunut meerartalinnut tapiissutinik pitsanngorsaanissaq.