Danmarkimi ilinniagaqartut angalasarnerannut tapiissuteqaqqittoqartalissagunartoq
Naalakkersuisut eqqarsaatigaat bussinermut qimuttuitsornermullu Danmarkimi kalaallinut ilinniagaqartunut tapiissuteqaqqittalernissaq.
Juliane Henningsen (IA) paragraf 36 aallaavigalugu Mimi Karlsenimut apeqquteqarpoq Danmarkimi kalaallit ilinniagaqartut angalasarnerannut tapiissuteqaqqittalernissaq pillugu. Tamanna Mimi Karlsenip tusarluarpaa.
Juliane Henningsenimut akissuteqarnermini ilinniartitaanermut naalakkersuisuusoq Mimi Karlsen allappoq 2005-imi, tassani atorunnaarsinneqarpoq, aningaasartuutit 54.000 koruuniusut.
- Ilinniagaqarnersiutit pillugit Inatsisartut peqqussutaata maanna atuuttup iluarsaateqqinneqarnissaanut atatillugu Naalakkersuisut misissorniarpaat eqqarsaatigalugulu Kalaallit Nunaata avataani ilinniagaqartut bussernermut aamma qimuttuitsornermut kortisisarnermut tapiissuteqartarnerup siornatigut atuussimasup atuutileqqinnissaa, angerlarsimaffimmiit ilinniarfimmut 5 kilometerit annertunerusorluunniit qaangerpassuk. Bussernermut qimuttuitsornermullu kortisisarnermut tapiissuteqartarneq annertunerusumut aningaasartuutitigut kinguneqartussaanngilaq, ilinniagaqartumulli sunniuteqangaatsiassaaq, Mimi Karlsen akissutimini allappoq.
Naqissuserpaa bussernermut qimuttuitsornermullu kortisisarnermut tapiissuteqaqqittalernissaq annertunerusumut aningaasartuutitigut kinguneqartussaannginnera.