Ikinnerusut ikiuutisianik pisalerput
2008-mi inuit ikinnerusut ikiuutisianik pisimapput. Immaqa pissutigalugu nutaamik suliffittaarneq imaluunniit ikiorsiissutinut allanut nuuneq, assersuutigalugu erninerup nalaani ullormusiat imaluunniit utoqqalinersiaqalerneq.
Pisariaqartitsineq malillugu ikiorsiissutinik, annertusisamik pisariaqartitsineq malillugu ikiorsiissutinik, ataasiarluni ikiorsiissutinik, annertussusileriikkanik ikiorsiissutinik kiisalu siusinaartumik sulisinnaajunnaarnersiutinik pisartut 5,7 pct.-imik ikileriarsimapput, ikiorsiissutillu tamakkua tunniunneqartut 2,9 pct.-imik ikileriarsimallutik.
Erninermut atatillugu ullormusiaqartartut 18,6 pct.-inik amerleriarsimapput, aningaasallu tamakkununnga tunniunneqartut 3,6 pct.-inik ikileriarsimallutik.
Utoqqalinersiallit 2,2 pct.-inik amerleriarsimapput, tamakkununngalu aningaasat tunniunneqartut 13,8 pct.-inik qaffariarsimallutik.
Pisariaqartitsineq malillugu ikiorsiissutinik, annertusisanik pisariaqartitsineq malillugu ikiorsiissutinik, ataasiarluni ikiorsiissutinik, annertussusileriikkanik ikiorsiissutinik kiisalu siusinaartumik sulisinnaajunnaarnersiutinik pisartut ikileriarput tamatumunngalu pissutaasinnaavoq inuit amerlanerusut suliffeqalersimanerat.
Aamma pissutaasinnaavoq inuit ikiorsiissutiniut allanut nuunnerat, assersuutigalugu erninermut atatillugu ullormusianut imaluunniit utoqqalinersiaqalernermut.
2007-imut sanilliullugu erninermit atatillugu ullormusiallit 2008-mi inunnik 193-inik amerleriarsimapput.
Utoqqalinersiallit eqqarsaatigalugit aningaasat tunniunneqartut 13,8 pct-inik amerleriarsimapput, utoqqalinersiallillu 2,2 pct.-inik amerleriarsimallutik. Tamatumunnga pissutaavoq 2007-imi juulip aallaqqaataanit utoqqalinersiat qaffanneqarnerat.
Tamakkua atuarneqarsinnaapput Kalaallit Nunaanni Naatsorsueqqissaartarfiup kingullermik naatsorsugaani, uunga iserluni www.statgreen.gl.