Silasiorfitoqqanik ilisimatusarneq

Sorsunnersuup kingulliup nalaani tyskit iligiillu Kalaallit Nunaanni annikitsumik, pingaarutilimmilli unammissuteqarput, tassalu silassamik ilimasaarutinik pitsaanerpaanik. Maanna silasiorfitoqqat ilisimatusarfigineqalerput.

DMI-p Tasiilami silasiorfia. Ass.: Sermitsiaq.

Tunup avannaani angutit 40-t missaanniittut Sorsunnersuup Kingulliup nalaani puigorneqakulasumik pingaarutilimmilli suliaqarput, tassalu silassamut ilimasaarutinik pitsaanerpaanik ilimasaaruteqarniarlutik, taamatut allappoq kristeligt-dagblad.dk.

Iligiit tyskillu silamik pitsaanerpaamik isumalluuteqarput, sorsunnermi timmisartut aqqartartullu atornialeraangamikkit. Sakkut nutaat sakkunit allanit silamik malussarinnerusimapput, taamaattumillu aalajangiisuusumik aporaannermi silap anorillu qanoq inneri ilisimasariaqarput.

Taamaattumik illu'atungeriit tamarmik Kalaallit Nunaat silasiornermi sukkasuumik pingaarsaatilerpaat, tassani silasiornikkut Europami tamarmi sila siulittuutigineqarsinnaammat. Tassa imaappoq, issittup silaannaa nillertoq silaannallu kissarnerit naapinnerat sakkulersornikkut pingaaruteqaleriataarpoq.

Kalaallit Nunaanni silasiorfinnik arlalinnik sanasoqarpoq, amerlaqisullu suli atapput sorsunnersuup oqaluttuarisaanerani kapitalitt immikkut ittutut.

Itsarnersiuup Jens Fog Jensenip Nationalmuseumimeersup oqaluttuarisaanermik ilisimatooq Tilo Krause peqatigalugu silasiorfiit arlallit assaaffigilerpai, ilaatigut Clavering Ø-mi Eskimonæsip eqqaaniittoq.

– Kalaallit Nunaanni silasiorfiit soqutiginaateqarput pissutigalugu inuit peqataasut tamaasa ilisimagatsigik. Aqqi tunuliaqutaallu ilisimallugit, silasiorfinnik sorsuutiginninnemri ataasiakkaat inissisimanerat pingaaruteqassusiallu qulaajarsinnaallugu. Illua'tungeriit tamarmik 20-it missaannaannik silasiortoqarput, amerlaqisullu imminnut ilisarisimapput, Jens fog Jensen Kristeligt-dagbladimut oqaluttuarpoq.

Angutit amerlanerpaat tamaani najugaqartuupput piniartut, umiartortut, silasiortut sakkutuullu ataasiakkaaginnaallutik. Sakkutooqarpianngikkaluartorli silasiorfeqarneq ima pingaaruteqartigaaq aporaattoqartarsimalluni.

Powered by Labrador CMS