Juliep aappa klubbimut allamut nuuppoq
Julie Berthelsenip aappaa, Minik Dahl Høegh, GOG-miit Fredericia HK-mut nuuppoq, neriuutigalugu tassani arsarnerusalissalluni.
Piffissami sivisuumi GOG Svendborgimi taartaasartutut kingoraartissamaatitullu atugaqareerluni kalaaleq nunanut allanut unammisartoq, 24-inik ukiulik Minik Dahl Høegh, maanna Fredericia HK-mut nuuppoq, tassanilu unammeqqaarsinnaavoq tallimanngornermi februari 5-ianni Århus GF-imut angerlarsimaffimminni unamminerminni, taamatut allappoq sporten.dk.
- Isumaqatigiissutaa Dansk Håndbold Forbundimit akuerineqartussaavoq, akueritiinnagassaavorli Fredericia HK-p forretningsføreria nutaaq Andreas Dyhrberg Fredericia Dagbladimut oqarpoq.
Nuunnissaa piviusunngorsinnaasimavoq aningaasaliisut arfinillit-arfineq-marluk ikiortigalugit.
Fredericia HK-p maanna sungiusaasuata Søren Hildebrandip Minik Dahl Høeghip assammik arsallaqqissusianik takunneqqaartuusimavoq inuusuttunilu nunanut allanut unammisartunut toqqarsimallugu. Tunuaniit isertitseriartartoq aatsaat assammik arsartalerpoq 17-inik ukioqarluni.