Ilinniariarlutik nunanut allanut aallartartut amerliartorput
Kalaallit Nunaanniit aallartarneq ingammik peqquteqarpoq inuusuttorpassuit Danmarkimut ilinniagaqariartortarmata. Taama naliliivoq Kalaallit Nunaanni Naatsorsueqqissaartarfimmi siunnersortaaneq.
– Takusinnaasarput tassaavoq nunanut allanut aallartut pingajorarterutaat ilinniagaqarniarlutik aallartartut, ukiullu ataatsip tallimallu akornaniittut qaangiukkaangata uteqqikkajuttarlutik, taama knr.gl-imut oqarpoq Kalaallit Nunaanni Naatsorsueqqissaartarfimmi siunnersortaaneq Lars Pedersen.
Amerlanerujartortut Kalaallit Nunaanniit nuuttarput. Tassalu nunasisuniit amerlanerujussuit. Tamannalu amerlanerit nunanut allanut nuuttarnerannik kinguneqarpoq. Kalaallit Nunaanni Naatsorsueqqissaartarfimmi kisitsisit nutaat takutippaat ukiuni qulini kingullerni kisitsit taanna qaffariangaatsiarsimasoq.
– Inuit Kalaallit Nunaani inunngorsimasut misissorutsigik tassani nunanut allanut nuunnermut nassuiaatissaavoq, arlalissuit ilinniagaqarniarlutik nuuttarmata. Tassaagajuttarpullu 15-iniit 25-nut ukiullit, nunanummi allanut nuuttartut ilarpassui taama ukioqartarput, taama naliliivoq Kalaallit Nunaanni Naatsorsueqqissaartarfimmi siunnersortaaneq Lars Pedersen.
2008-mi inuit nunanut allanut nuuttut nunasisuniit 653-inik amerlanerupput – ukiunilu qulini kingullerni kisitsit taanna aatsaat taama qaffasitsigaaq.
Nunanut allanut nuuttut amerlanersaat 15-iniit 29-nut ukioqarput – amerlanerillu arnaapput, Kalaallit Nunaanni Naatsorsueqqissaartarfimmi kisitsisit takutippaat.
Kalaallit Nunaanni Naatsorsueqqissaartarfimmiit kisitsisit aamma takutippaat innuttaasut amerlassusaat ukiup sisamassaa appariarsimasoq.
Januaarip 1-ani 2005 maani najugaqarput 56.969, 2009-mi januaarip 1-ani inuit 56.194-ullutik. Tamannalu inunnik 715-inik ikileriarneruvoq.