UNESCO ilumooriaannaavoq
Kalaallisut oqaatsit pisortatigoortumik oqaasinngortillugit ineriartortinneqanngippata, kalaallisut oqaatsit UNESCO oqarneratuut navianartorsioriaannaapput, taama oqarpoq Oqaasiliortuni siulittaasoq.
UNESCO-mit nalilerneqarpoq kitaamiut oqaasii innarlerneqariaannaasut, tunumiut avannaamiullu oqaasii navianartorsiortutut taaneqarsinnaallutik.
UNESCO ilumooriaannaavoq qinersisartut Namminersorneq pillugu inatsimmik tapersersuisut inatsisip siunertaata ilaa pimoorutinngippassuk, tassalu Kalaallit Nunaanni oqaatsit pingaarnerit tassaasut kalaallit oqaasii, taama oqarpoq Oqaasiliortut siulittaasuat Carl Christian Olsen, oqallinnermut akuliunnermini.
Kalaallit oqaasii piujunnaarnissamut navianartorsiussapput ima pisoqarpat:
- Pisortatigoortumik oqaatsitut atorneqarlutik piorsarneqanngippata
- Nunatsinni innuttaasut siunissami ulluinnarni kalaallit oqaasii atunngippatigik: angajoqqaat perorsaaneranni, ilinniutini sutigullu tamatigut ilitsersuinikkut
- Innuttaasut upperilinngippassuk kalaallit oqaasi oqaatsitulli allatut ataqqinassuseqartut
- Sutigut tamatigut kalaallisut allagartalersuisoqanngippat
- Namminersorneq pillugu inatsimmi kalaallit oqaasii kalaallisut taaneqarput, taassumalu iluaniipput Kitaamiusut, Avanersuarmiusut Tunumiusullu. Oqaatsit taakku immikkut oqaatsitut taaneqarsimanngillat (soorlu aamma Jyllandip avannaani Thy-mi innuttaasut oqaasii Danmarkimi immikkut oqaatsitut naatsorsuunneqanngitsut), Carl Christian Olsen oqarpoq.