Nuummi sisorartartut cafeteriartaarput
Tallimanngormat Sisorarfiit cafteriani nutaaq angisooq atoqqaarfissiorpaa. Maanna apinissaa amigaataaginnalerpoq.
Kommuneqarfik Sermersooq naasunik checkimillu 5.000 koruuninik aningaasartalimmik tunniussaqaroq, sisorartartut klubbiata Sisorarfiit cafeteriani nutaaq 220 kvadratmeterisut angissusilik inunnullu 100-nut nissalik atoqqaarfissiormagu.
Kommunip tunissutai kommunerujussuup Ineriartornermut Ataatsimiititaliaani siuilttaasumit Mille Søvndahlimit tunniunneqarput.
Taassuma Sisorarfiit ineriartorusunnera ilalersorluarpaa, tamannali peqatigalugu erseqqissarlugu kommunip karsia nungussaanngitsunik aningaasaateqanngitsoq.
Sisorarfiit siunissamut ilaatigut anguniagaraa sisoraatinik qummukartarfiup eqqaani tatsimi qullilimmik sukuutsertarfeqalernissaq.
Tamatuma saniatigut siulersuisut tamassua aasakkut atorneqartalernissaa sulissutiginiarpaat, taakkua siunnersuuteqarput Quassussuarmi pisuttuartunut sikkilerlutillu mountainbike-rtartunut aqqutit pitsaanerusumik nalunaarsorneqarnissaat.
Kiisalu Sisorarfinni suliniuteqarluartut neriuutigaat inimi nutaami angisuumi igaffeqalernissaa, atuisartunut peqqinnartunik nukittornartunillu ullo´qeqqasiorfeqalerniassammat.
Soorluli Sisorarfiit siulittaasuat ammaanersiornermi oqartoq, qularutissaanngilaq ulluni makkunani kissaatigisat annersarigaat: Apilluarnissaa.