Imeqqutaalaq sivisunerpaamik timmisarpoq
Timmiannguaq Kalaallit Nunaanni piaqqiortartoq nunarsuarmi timmissanit tamanniit ungasinnerpaamut ingerlaartarpoq, misissuinerup nutaap takutippaa.
Timmiannguup taassuma 100 grammit sinnilaarlugit oqimaassusillip ukiumut 71.000 kilometerit ingerlaartarpai. Uumanermini taamaalilluni pingasoriarluni qaammammuliarnertut uterlugulu isorartussusilimmik timmisartoq, ilisimatusarnerit nutaat takutippaat.
Pinngortitaleriffimmiit Carsten Egevang Tuluit Nunaanni, USA-mi Islandimilu suleqatiminik suleqateqarluni siullersaallutik imeqqutaallap ingerlaartarfiinik nalunaarsuisimapput.
Misissuinerup tupaallannartumik takutippaa, imequtaallap kujammut ingerlaartilluni Atlantikup imartaata qeqqani qaammat ataaseq uninngaartartoq, kingornalu timmissat Afrikap kitaata sineriaanut ingerlaaqqilerlutik. Kingornali timmissat marlunnut avissaartarput: Affai Afrikamut kujallermut ingerlaqqittarput, affaalli Atlantikoq ikaarlugu kujammut Amerikap kujalliup imartaanut ingerlaqqillutik.
Misissuinerit inernerisa aamma takutippaat, Sikuiuitsumiit kujallermiit angerlamut ingerlaarnerminni aqqut naannerpaaq atorneq ajoraat. Timmissat S-erujussuartut ilusilimmik timmisarput, tassalu aqqut narlorimmik avannamut ingerlaarnissamiit kilometerinik tusintilikkaanik isorartunerusoq aqqutigisarlugu. Sumi nerisassaqarnera anorimiluunniit oquminnissaq apeqqutaatillugit sangujoraartarput.
Uuttuut nutaaq, geolyslogger qaamanerup sakkortussusianik nalunaarsuisartoq sumiissusersiuutinngortitsisartoq, atorlugu imeqqutaallanik misissuineq ingerlanneqarpoq. Siunissami uumasut ingerlaartarnerannik ilisimatusarnermi atortup nutaap atornissaa periarfissaalerpoq.
Misissuinerup inerneri amerikamiut ilisimatuussutsikkut atugassiaani akimasuumi 'Proceedings of the National Academy of Sciencemi' saqqummersinneqaqqammerput.