Svanep isornartorsiuineq utertippaa

Borgmesteri Jess Svane isumaqarpoq Qaasuitsup Kommuniani aningaasaqarneq pitsaasuusoq, Demokraatillu isornartorsiuinerat paasinngilaa.

Borgmesteri Jess Svane, Siumut. Foto: Jørgen Chemnitz

Qaasuitsup Kommuniata borgmesteriata Jess Svanep, Siumut, kommunimi aqutsinerminut tunngatillugu kommunalbestyrelsemi ilaasortap Demokraatineersup Ane Lone Bggerip isortartorsiuinera paasisinnaanngilaa.

Taassuma ataasinngormat piumasaraa kommunerujussuup aningaasaqarnera misissoqqissaarneqassasoq, borgmesterillu ammanerusumik pissuseqarnissaa ujartorlugu.

Isornartorsiuineq tamanna Jess Svane tunngavissaqanngissoraa. Isumaqarpoq kommunip aningaasaqarnera patajaatsuusoq, unnerlugulu 2009-mi kommunit kattunneranniit akileraarutitigut akiitsunik 2006-meersunik kingornussineq kommunerujussuup aningaasaqarneranut artukkiisimasoq.

– Ane Lone Baggerip isornartorsiuinera paasisinnaanngilara. Ukioq manna aningaasanut missingersuut nammineerluni akuerseqataaffigaa, isumaqarpungalu aalajangeeqataaffigisani suunersoq paasisimanngikkaa, Jess Svane KNR-Radioaviisimut oqarpoq.

Borgmesteri oqarpoq, kommunalbestyrelsip ataatsimiinnerisa imaqarniliorneri ilaasortanut tamanut nassiunneqartartut, aamma Ane Lone Baggerimut.

Taassuma saniatigut Jess Svane isumaqarpoq, Demokraatit isornartorsiuinertik kommunalbestyrelsimut ingerlattartuuppassuk tulluarnerussagaluartoq tusagassiuutitigut pinnagu.

Decembarimi paasinarsivoq, Qaasuitsup Kommuniata nunatta karsianut akileraarutitigut akiitsuni akilerniarlugit nunatta karsianiit 53 millioner koruuninik attartorsimasoq.

Powered by Labrador CMS