KNR: Pingaarnersiuineq apeqqutaavoq
Nukiit sumut atorneqarnissaannik pingaarnersiuineruvoq, KNR-ip aalajangermagu nittartakkakkut oqalliffik matuniarlugu, KNR-imi pisortaq oqarpoq.
KNR-imi nutaaliornermut immikkoortortami nutaani pisortap Martin Chemnitzip ajuugaarutigaa, KNR-ip qarasaasiakkut oqallittarfik matusariaqalermagu.
– Ajuusaarnerpaavunga, oqaaseqarsinnaanermut periarfissaq matusariaqaratsigu, uangami nammineerlunga tamanna pilersissimavara, nittartakkamut akisussaasuugallarama, taama sermitsiaq.ag-mut nassuiaavoq Martin Chemnitz.
Erseqqissarpaa oqallittarfimmik matusineq kiffaanngissuseqarluni isummersinnaanermik killilersuiniarnerunngimmat. Tamanna ulluinnarni ulapiffioqisuni nukinnik pingaarnersiuinermik tunngaveqarpoq.
Martin Chemnitzip aamma malugaa, oqaaseqaatit amerliartorlillugit suliassaq annertusiartorsimasoq.
– Inunnut ataasiakkaanut saassussinerit amerlasimaqaat, paasissutissanillu mianernartunik saqqummiisarnerit, taakkumi soorunami uagut saqqummersikkusunngilagit. Ilaatigut oqaaseqaatit killissamiittarput, ilaatigut isummanik anitsinerinnaasarlutik, taamaattorli inunnut atasiakkaanut tunngatinneqarpallaaraangata, eqqartortariaqartarparput oqaaseqatit saqqummersissanerlugit imalunniit naagga, Martin Chemnitz nassuiaavoq.
KNR-ip oqaaseqaateqartarfia matuneqarmat sapaatip akunnerata naanerani sermtisiaq.AG-mi eqqartorneqaqaaq. Immaqalu aaqqiissutissaqarpoq:
Martin Chemnitzip oqaatigaa, KNR-ip nittartakkani iluarsaateqqissagaa. Atoruminarnerussaaq, KNR-imi pisortaq oqarpoq, tassanilu immaqa imikkut ittumik oqallittarfimmik pilersitsisoqassaaq, KNR-imit qulequttat aalajangersimasut oqallisigitinneqartarlutik. ,