Inuit EU eqqartuussivimmut suliassiissutigaat
EU-mut puisit amiinik eqqusseqqusiunnaarneq eqqortuliornerunersoq maannakkut eqqartuussivimmi misilinneqassaq, taama isumaqarput kattuffiit ICC, KNAPK aamma Canadami Inuit.
Puisit amiinik eqqusseqqusiunnaarneq qassiiliuutaaqisoq atorunnaarsinneqartariaqarpoq. Taama isumaqarput inuit suleqatigiiffiat ICC, aalisartut piniartullu kattuffiat KNAPK kiisalu Canadami Inuit.
Maannakkullu ataatsimoorlutik tamanna eqqartuussivimmut suliassiissutiginiarpaat, knr.gl allappoq.
- Suleqatigiilluta EU-mi Inatsisartut puisit amiinik tunisassianik EU-mi nunanut eqqusseqqusiunnaarnerisa ukioq manna aggustip aallaqqaataani atuutilersussap eqqartuussivikkut misilinnissaa suliariniarlutigu aalajangerpugut, Kalaallit Nunaanni ICC-p siulittaasua Aqqaluk Lynge oqarpoq.
Lissabon -Traktatimik taaneqartartup atuutilerneratigut tamanna periarfissanngorsimavoq, tassalu EU-mi Inatsisartut aalajangersagaat, niuernikkut unammillersinnaanermut tunngassutillit, eqqartuussivimmi tassani misilinneqarsinnaanngorsimammata.