Persuttaasartut sammineqarnerulissapput
Persuttaasarneq pillugu ataatsimeersuarnerup kingorna Kommuneqarfik Sermersuup persuttaasartut samminerusalerniarpai.
Novembarip 25-anni arnanut nakuusertarnermut akerliuniarluni FN-ip nunani tamalaani ullorititaanut atatillugu Isumaginninnermut Naalakkersuisoqarfik ataatsimeersuartitsivoq.
Ataatsimeersuarnerup kingorna Kommuneqarfik Sermersuup persuttaasartut samminerulerniarpai.
– Persuttaasartut soorunami qimarnguinniittassanngillat, misissorparpulli qanoq isilluta persuttaasartut ikiorsinnaanerivut aammalu qanoq isilluta tamanna annertunerusumik paasiniaaffigisinnaaneripput. Tassami amerlasuutigut persuttaasut psykopaatiunngillat ulorianartut, inuinnaappulli allaanerusumik qisuariartartut, Kommeqarfik Sermersuumi Atugarissaarnermut Ingerlatsivimmi Meeqqanut Ilaqutariinnullu immikkoortoqarfimmi pisortaq Mette Sonniks oqarpoq, taassumalu ataatsimeersuarneq nuannaarutigaa, Kalaallit Nunaanni persuttaasarnermik annertuumik paasissutissiimmat takutitsillunilu.
Kommuneqarfik Sermersuup aamma sulissutiginiarpaa Tasiilami qimarnguimmik pilersitsinissaq, tassa Nuuk Paamiullu kommunimut atasunik qimarngueqareermata.
Sermitsiaq nr. 49 atuaruk...