Meeqqat illoqarfimmiut meeqqallu nunaqarfimmiut

Meeqqat peqqissusiat inuunermi atukkanut attuumassuteqarpoq, nalunaarusiami meeqqat inuusuttullu pillugit ilisimasanik katersuiffiup MIPI-p ullumi saqqummiussaani taamatut allassimasoqarpoq.

Inuit peqqissusaannut doktori Birgit Niclasen misissuisuusimavoq, tamannalu meeqqat inuuussuttullu pillugit paasissutissat katersugaareersimasut tunngavigalugit ingerlassimallugu.

Misissuinermi ilaatigut takuneqarsinnaavoq meeqqat inuussuttullu peqqissusaat assigiinngitsorujussuusut, Nuummi, illoqarfinni anginerusuni, illoqarfinni mikinerusuni isorliunerusunilu, illoqarfinni nunaqarfinnilu najugaqarnerat apeqqutaalluni.

Misissuinermi ilaatigut takuneqarsinnaavoq, meeqqat nunaqarfinni isorliunerusunilu najugallit peqqinngikkajunnerusartut.

Soorlu assersuutigalugu 15-inik ukiullit Nuup nunaqarfiini najugallit peqatiminnit illoqarfimmi najugaqartunit pujortarajunnerusarput, paarlattuanilli inuusuttut Nuummi najugallit inuussuttunit nunaqarfinni najugalinniit imigassartuliaarnerusarput.

Meeqqat Nuup nunaqarfiini najugallit amerlanerusut angerlarsimaffimminni nerisassanik amigaateqartarput, nunaqarfinnili meeqqat aamma mamakujuttutorajunnerusarlutillu sodavanditorajunnerusarput paarnanillu nerinnginnerusarlutik.

Nunaqarfinnili meeqqat Nuummi meeqqaninngaanniit puisit arferillu neqaannik nerigajunnerusarput.

Powered by Labrador CMS