Qaasuitsumi kommunaldirektøri soraarpoq
Qaasuitsup Kommuniani pisortaaneq Sigvard Hvidsteen ingerlaannartumik soraarpoq.
Qaammatini quliniinnarni atorfeqareerluni Sigvard Hvidsteen kommunaldirektøritut tunuarpoq, Qaasuitsup borgmesteriata Jess Svanep oqarnera naapertorlugu illuatungeriit isumaqatigiissuteqarnerat tunngavigalugu.
Pisortaanerup soraarnera Jess Svanep itisilerumanngilaa, oqaatiumanngilaalu soraarsitsinerunersoq imaluunniit namminerluni soraarnerunersoq.
Sermitsiaq.gl-illi paasisiai naapertorlugit kommunaldirektørip kattuffik ilaasortaaffigisaa kommunillu inatsisilerituua suliassamik ingerlataqarsimapput.
Sigvard Hvidsteen februaarimi 2009 kommunerujussuarmi pisortaanertut atorfinitsinneqarpoq. Tamanna sioqqullugu Københavnp Kommuniani meeqqanutinuusuttunullu immikkoortortami pisortaavoq, siusinnerusukkullu Nanortalimmi atorfeqarsimalluni.
Aningaasaqarnermut Isumalluutinullu maannamut pisortaasoq Henrik Rafn Qaasuitsup Kommuniani allaffissornermut pisortaanerugallartutut ivertinneqartoq, Jess Svane ilisimatitsivoq.