Ilassinninnermut malittarisassat nutarterneqarput
Taamaallaat borgmesteri, qullersaqarfimmi ilaasortat pisortallu immikkut akuersissutillit Kommuneqarfik Sermersuumi ilassinninnermut aningaasartuuteqarsinnaapput.
Kommunalbestyrelsip kingullermik ataatsimiinnermini kommuniusimasuni tallimani ilassinninnermut aningaasartuutit naleqqussarnerannut sinaakkutassat akuersissutigai, taamatut allappoq sermersooq.gl.
Kommunalbestyrelsip aalajangersarpaa kommunimi inuit qinigaat sulisuilu kisimik aaqqissuussinerni, kommunip sinniisoqarfigisaani, peqataasinnaasut.
- Piumasaqaataavoq komminip sinniisoqarnissaa. Tassa imaappoq, ilassinninnermut kontu partiit politikkikkut ataatsimiititsineranni atorneqaersinnaanngilaq, kommunalbestyrelsip aalajangiinermut tunngaviani allassimavoq.
2009-mi borgmesteri ilassinninnermut 300.000 koruuninik atugassaqartinneqarpoq, allattoqarfillu 199.000 koruunit sinnerlugut atugassaqartinneqarluni.
Kommuneqarfik Sermersuup 2010-mi ilassinninnermut 500.000 koruunit missarpiaat immikkoortissimavai.