Naalakkersuisoqarfiit illoqatigiilissapput

Nutartigaq: Naalakkersuisoqarfiit tamarmik Katuap eqqaani illorsualiassamut 2012-imi nuussinnaalissapput. Power Pointikkut takutitassiaq takuuk.

Nuuk Center katillugit qulinik quleriinngussaaq, naalakkersuisoqarfiit ilannguppata. Assi: MT Højgaard

Namminersorlutik Oqartussat Nuummi sulisuinut allaffeqarfissamik nutaamik sananissamik Naalakkersuisut aalajangerput.

Taamaattorli suliffeqarfimmut M. T. Højgaardimut pilersaarnermik nalunaaruteqarniarlutik inaarutaasumik isumaqatigiissut atsiorneqannginnerani Inatsisartut aningaasaqarnermut ataatsimiititaliaanni akuersissutigineqaqqaassaaq.

- Namminersorlutik Oqartussat sulisuisa Nuummi sumiiffinni arlalinni amerlanertigut illuutini allaffeqarfittut naleqqutinngitsuni allaffeqartinnissaannut taarsiullugu sumiiffimmi ataatsimi katersuutsinnissaannut periarfissaqaleratta pingaaruteqarpoq – naalakkersuisoq Jens B. Frederiksen oqarpoq.

Allaffeqarfissaq nutaaq 8-inik quleriiussaaq, katillugit 7000 kvm-erisut angissuseqassalluni, Nuuk Centerissatut pilersaarutaasup Katuap saniani sananeqartussap qaavani inissisimassalluni.

Allaffeqarfissamut nutaamut akigititassaq aalajangersimasumik akigititaasussatut isumaqatiginninniutigineqareerpoq aammalu kvadratmeterimut ataatsimut 19.052 koruuniussalluni.

Allaffeqarfik Namminersorlutik Oqartussat illuutileqatigiiffiannit Illuut A/S-imit pilersinneqaleruttortumit pisiarineqassaaq pigineqassallunilu. Tamatuma kingorna Illuutip allaffeqarfik Namminersorlutik Oqartussat allaffeqarfiannut attartortissavaa.

Suliassaq Namminersorlutik Oqartussanut ukiut siulliit qulit 100 koruuningajalluinnarnik iluanaarutaasussaavoq, pissutigalugu ineqanermut akiliummut aningaasartuutissat Namminersorlutik Oqartussat nammineq ingerlatseqatigiiffiutaanit akilerneqartussaammata.

Tamatuma saniatigut ukiuni qulini siullerni aningaasanngorlugit sipaarutissat 20 mio. koruunit missaanniittussaapput, pissutigalugu Illuut-mut ineqarnermut akiliutissaq aalajangersimasuusussaammat iluarsineqartartussaassananilu. Illuut-mut ineqarnermut akiliut aamma Namminersorlutik Oqartussat ullumikkut qitiusumik allaffeqarfiup avataani attartukkanut akiliutigisartagaannit appasinnerusussaavoq.

Sanaartorneq 2010-imi aallartissaaq aammalu allaffeqarfik 2012-ip qiteqqunnerani iserterfigineqarsinnaalissalluni.

Power pointikkut takutitassiaq takuuk:

Powered by Labrador CMS