Kuupik ulapissuataarpoq
Naalakkersuisut siulittaasuat Danmarkimiinnermini saariagassaaleqinngilaq.
Kuupik Kleist, IA, atorfilittanilu sisamanngormat unnukkut Danmarkimut tikipput. Ataatsimeeqattaartussaavoq, pingaartumillu Kalaallit Nunaata silap pissusai pillugit silarsuarmi nutaamik isumaqatigiissuteqartoqarnissaanut tunngatillugit kissaatigisai pillugit Danmarkimi silap pisuusaanut ministerinngorlaamik Lykke Friis-imik, V, ataatsimeeqateqarnissaa pissanganartussaavoq.
Sermitsiap paasisai malillugit taakku ulapputissaqaqisut periarfissaqassagunik ataasinngorpat ataatsimeeqatigiittussaapput.
KNR malillgu Kuupik Kleistip tallimanngorpat professor Ole Spiermann, Kalaallit Nunaata nammineerluni silap pissusai pillugit isumaqatigiissuteqarsinnaaneranik misissuisuusimasoq, naapissavaa.
Tallimanngorpat kingusinnerusukkut Kuupik Kleistip Kunngissaq Frederik Den Nordatlantiske Brygge-mi Københavnimiiittumi saqqummersitsinermik 'In the eye of climate change'-imik ammaaqatigissavaa.
Arfininngorpat naalakkersuisut siulittaasua Oprindelige Foks Dag-imi Nationalmuseemi ingerlanneqartumi peqataassaaq, sapaatiuppallu Kalaallit Nunaata silap pissusaasa allanngornerat pillugu isumaanik saqqummiussissalluni. Tamannalu Savalimmiuni nunap iluani pissutsinut lagmandi, Annika Olsen, Folkaflokkurin, peqatigalugu Den Nordatlantiske Bryggemi ingerlatissavaa.
Ataasinngorpat Kalaallit Nunaanni oqartussaasut COP15-imi Bella Centerimi ingerlanneqartumi sideevent-imik taaneqartumi peqataassapput. Pisussaq 'Greenland ice sheet - Melting snow and ice: Calls for action'-imik taaguuteqassaaq aammalu Danmark Norgelu suleqatigalugit aaqqissuunneqarsimalluni. Danmarkimi Norgemilu nunanut allanut ministerit naalakkersuisut siulittaasuat Kuupik Kleist silallu pissusaanik sorsuutiginnittoq USA-mi præsidentimut tulliusimasoq Al Gore oqalugiartuussapput.