Piumassutsimik sulinermut aningaasat

Kommuneqarfik Sermersuumi Tungiuinermut Ataatsimiititaliaq Unnuarissanut peqqinnissakkullu suliniummut »Maaji peqqinnartuutiguk«-mut aningaasanik tapiissuteqarpoq.

Unnuarissat ilaatigut kommuni tamarmi piumassutsiminnik ikiuuttussanik pikkorissaanissamut Nuummilu angalaartarnermi inimik nuunneqarsinnaasumik kialaariartarfeqarnissamut 250.000 kroninik tapiiffigineqarput, Kommunqarfik Sermersooq nittartakkamini taama allappoq.

Suliniut 'Maaji peqqinnartuutiguk' ukiormanna aamma iluatsilluarsimasoq 2010-imi ingerlatseqqinnissamut aningaasanik tapiiffigineqarpoq.

– Maaji peqqinnartuutiguk tapiiffigineqarpoq pissutigalugu, taanna timigissartarnerup nerisaqarnermillu allannguinerup iluaqutaanerannik oqaluttuussiffiusarmat. Tungiuinermut ataatsimiititaliap tapiissuteqarnermigut neriuutigaa, suliniutaasartoq taanna siunissamissaaq ingerlanneqartuarumaartoq, Kommuneqarfik Sermersooq allappoq.

'Maaji peqqinnartuutiguk' aappaagu iliuuseqarnissamut 200.000 kroninik tapiiffigineqarpoq.

Powered by Labrador CMS