26-nik ukiulik sapiitsuliortutut nersornaasigaasoq
Carnegiep sapiitsuliortunut nersornaasiuttagaa 26-inik ukiulimmut Peter Rosvig Pedersenimut tunniunneqarpoq. Tanna inummik annaassivoq, Ukkusissat eqqaanni sermip iigarnerata maliinit qallunaat allat marluk ajunaarmata.
Ukiut tamaasa qallunaat nalinginnaalluinnartut sapiitsuliortarput. Pingasunngormat 21-t Carnegies Belønningsfond for Heltemodimit nersornaaserneqarput inuit inuunerannik annaassisimasutut. Taakkua ilagaat 26-nik ukiulik Peter Rosvig Pedersen, Københavnimeersoq, taannalu 2008-mi aasakkut Uummannap avannaani Ukkusissani ipilluni ajunaartoqarnerani alianartumi akulerussimavoq. Peter Rosvig Pedersen affarmik kalaaliuvoq.
Tassani qallunaat takornariat Ukkusissat eqqaanni Kangerluarsuup iigartartuata eqqaani nunamut ikaarsimapput, iigartartorlu mallertitseriataarmat takornariat sissap sinaani gummibådimut ikiartoqquneqarput.
Iigartoq malissiortitsigajuttarpoq sermip qaavani sermip aannera sermip iluanut katersuukkaangat. Erngup naqitsinera annertuvallaaleraangat sermeq pitarlugu imeq sukkasoorujussuarmik kuulersarpoq.
Takornarianit sissamiittunit 15-init arfineq-pingasut gummibådimik sukkasuumik takornariat umiarsuaaraannut Kisaq-mut ikaanneqarput, Peter Rosvig Pedersenilu sissamiiginnarpoq sinneruttut ikiorniarlugit.
Angutit marluk Københavnip eqqaamiut 70-inik aamma 73-inik ukiullit sermip erngullu kuuffianut qaninnersaapput. Peter Rosvig Pedersenip kuuk ikaartillugu ikiorpai, tamatumali kingorna pingasuullutik kuugussaapput angutillu utoqqaat taakkua marluk ipillutik ajunaarput.
Tamanna peqatigalugu inuit kingulliit sisamat sissap sinaaniittut malimmit amuneqarput avammukaanneqarlutik.
Gummibådimik ingerlatsisut pingasut gummibådimut ikivaat, Peter Rosvig Pedersenip inuk kingulleq kivitsaalioeraa gummibådip ikioriartorluni uternissaata tungaanut.
Tamarmik isumannaatsumik umiarsuaaqqamut ikaareermata taanna sissamut uterpoq ajunaartut ujariartorlugit.