Danmarkimi kalaallit palasit uneqquneqarput
Naak akissarsiaqanngikkaluarlutik taamaattoq naalagiartitsisarput
Inuit amerlassusaat eqqarsaatigissagaanni nunatsinni ilagiit amerlanersarigunagaat tassalu kalaallit tamarmik pingajorarterutaat anersaakkut sumiginnarneqartussanngussapput kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup piumasani pissappagu.
Naalakkersuisoqarfimmit nalunaarutigineqarsimavoq palasi Jens Kristian Kleist taamaallaat ilageeqarnermut tunngasunik suliaqartinnaasoq taamallaat kalaallinut "Danmarkimiittariaqartunut".
Allatut oqaatigalugu palasi allallu kalaallit Danmarkimi soraarninngorsimasut Namminersorlutik Oqartussanit akilerneqartarunnaassapput Danmarkimi nunaqqatiminnut ilageeqarnikkut sullissigaangamik.
Taamaattumik provsti soraarneq Richard Petersen aamma Ilannguaq Geisler Jensen arfininngorpat palasip Jens Kristian Kleistip tunuaniissapput Vejlemiit nunatsinnut juullimut inuulluaqqusisoqarnerani Lukasip iivangiiliuanik atualerpat.
Pisarneq malillugu kalaallit 2000 missaaniittut Vejleliassangatinneqarput nunatsinni ilaquttaminnut ikinngutiminnullu juullimut inuulluaqqusiniarlutik. Jens Kr. Kleistip palaseqataasalu nipaatsumik akerliussutsimik takutitsinermikkut oqaatiginiarpaat anersaakkut misigissutsit tassaanngitsut Nuummi naalakkersuisoqarfimmit aqunneqarsinnaasut.
– Juullip ukiortaallu tungaanut Danmarkimi tamarmi kalaallisut naalagiarnissamik pilersaarutit ingerlanneqarumaarput. Nunaqqativut sumiginnarnavianngilagut aningaasat piinnarlugit. Naalagiarnerit taakku ingerlanneqassapput naak akilerneqanngikkaluarluta, palasit isumaqatigiillutik oqarput.