Qimmiutilik: Qimminut nerukkaatissaaleqisoqarpoq
Politikerit qineqqusaarutitik puigorsimavaat.
– Qimminut nerukkaatissat amigaataapput, Poul Jørgensen Ove Karl Bertelsenip qimmit qimuttut pillugit oqaaserisaanut tunngatillugu oqarpoq.
Poul Jørgensen Ilulissani najugaqartoq 12-nik qimmeqartoq oqarpoq, qimminut nerukkaatissarsiniartarneq ilungersunarsigaluttuinnartoq.
– Suliffissuarmi igitassanik pisisarsinnaanikuugaluarpugut. Massakkulli taamaaliorsinnaajunnaarnikuuvugut. Fiskemel-it aamma qimminut pitsarujussuugaluarput, kisianni tamakkuluunniit pisinnaajunnaarpagut. Qasigiannguani, massakkut qalerallerffiusartumi, aalisakkat igitassartaat eqqaannartarpaat, taamalu Avaannaani qimmiutillit atorfissaqatitsigialuaraat.
– Qineqqusaarnermi - inatsisartunut kommuninullu - politkerit qimmiutillit ikiussallugit neriorsuigaluarput. Qimminut nerukkaatissanik pissarsissanerarlutik. Massakkulli qineqqusaarutiginikuusatik puigoreerpaat, Poul Jørgensen oqarpoq.
– Ove Karl Berthelsen nammineq oqarpoq, qimmit atorlugit piniartarneq inuussutissarsiutaasoq, qimmillu inuussutissarsiornermi atortuusut, qimmiutillilli tapersersorumanngilai. Taamaallaat piumaffiginnippoq. Uagut aamma qimmigut paarilluarusuppagut, Poul Jørgensen nassuiaavoq.
Qimminut nerukkaatissaqannginnatta qimmigut saluppallaalersarput, Poul Jørgensen oqarpoq.
Nunatsinni qimmit qimuttut 21.000-it missaanniipput, nerukkaatissallu amigaataanerata qaangerneqarnissaanut politikerit suleqataasariaqarput.
Danmarkimiit nerukkaatissarsiniartassagaanni qimmeqarneq akisoorujussuanngussaaq. Aalisakkat igitassartaat suliffissuarni fiskemelliliaritissinnaasariaqarpagut. Tamanna qimmiutilinnut iluaqutaassaaq. Tamannalu uanga Ove Karl Berthelsenip oqaaseqaatigisaaniit pingaarnerusutut isigaara, Poul Jørgensen oqarpoq.
Fiskemeli qimminut nerukkaatissat pitsaanersaattut isigai, tamakku qimminut nerukkaatissanik allanik akuneqarsinnaasarmata.
– Fiskemelit atorlugit qimminut nerukkaatissat akisuut sipaarneqarsinnaasarput, Poul Jørgensen oqarpoq.
Piniariarluni qimminut nerukkaatissarsiortarneq ajornakusoortuuvoq. Massakkullu aputeqarpiaranilu sikoqanngmmat qimussertoqarsinnaanngilaq, oqarpoq.