Binzer: Ilinniartitaanerit amerlanngitsut aalluneqarlik

Kalaallit Nunaata ilinniartitaanerit amerlanngitsut, kisianni ilinniakkani ilinniartitaanerit atorfissaqarluartut aalluttariaqarpai. Sinneri inuusuttut nunani allani ingerlattariaqarpaat, Air Greenlandimi pisortaaneq Michael Binzer isumaqarpoq.

Kalaallit Nunaanni ilinniartitaanerit tamaasa ingerlatissallugit innuttaasut ikippallaarput. Assiliisoq: Jørgen Chemnitz.

Michael Binzer isumaqarpoq Kalaallit Nunaanni ilinniartitaanerit tamaasa ingerlatissallugit innuttaasut ikippallaartut, knr.gl allappoq.

- Uagut maani nunami ima amerlatiginngilagut ilinniartitaanerit tamaasa ingerlassinnaassallutigit. Ikippallaarujussuarpugut. Uagut pisariaqartipparput nunani allani qanoq iliortarnersut qimerluussallugu, taava taakkunani inuusortuttortavut ilinniakkanik ingerlatsissapput. Tassani pineruakka ilinniartitaanerit qitiusut soorlu assersuutigalugu inatsisilerituutut aamma nakorsatut ilinniartitaanerit, Air Greenlandimi pisortaaneq Michael Binzer aallakaatitassiami DRip P1-iani taaguuteqartumi samfundstanker, oqarpoq.

- Toqqaasariaqarpugut oqarlutalu ilinniartitaanerit qaffasissut suut Kalaallit Nunaanni ingerlanneqassanersut, kiisalu sorliit akuerisariaqarivut inuusuttatta nunanut allanut aallarlutik ingerlattariaqarneraat, oqarpoq.

Assersuutigisaa tassaavoq Danmarkimi illoqarfiup Koldingip ilinniartitaanerit tamaasa ingerlanneqassagaluarpagit.

- Uagut Koldingimi innuttaasut amerlaqatigingajappagut Europallu Kitaata angeqatigisaani siaruarsimalluta. Ilumut uanga upperinngilara Koldingimi atorfiit atorfissaqartinneqartut tamaasa inuttalerniarlugit ilinniartitaanerit Koldingimi tamarmik ingerlanneqassappata. Tamatuma piviusunngornissaa ilimananngilaq. Nunat allat suleqatiginissaat atorfissaqartipparput. Inuusuttortavut nunanut allanut aallartittariaqarpavut soorlu Danmarkimut, Islandimut imaluunniit USA-mut ilinniakkamik pitsaasumik naammassinninniassamata, oqarpoq.

Tamatuma akerlianik isumaqarpoq, kikkulluunniit ilinniartitaanerminnik nunami allami akiliunneqartut pisussaaffeqartut ilinniagaqartik atoriartorlugu utissallutik .

- Ilinniartitaanerit inuiaqatigiit kalaallit akilerpassuk, taava uanga isumaga malillugu isumaqatigiissuteqartoqarsimassasoq, pisussaaffilerneqarluni uternissamut ukiullu arlallit sulilluni. Taamaanngippat aningaasat pissarsiarisimasat utertinneqartariaqarput. Inuiaqatigiit kalaallit akissaqanngillat taamatut aningaasanik igalaakkut eqqaaginnarnissamut. Inuit 57.000-iuvugut pisariaqartippagullu ilinniarluarsimasut uterlutik kalaallit inuiaqatigiit ineriartornerannut peqataanissaat, Michael Binzer oqarpoq.

//-->
Powered by Labrador CMS