Qunnersuaq Danmarkip piumasaqaataanut iluaqutaasinnaavoq
Afrikap avannamut kangiani, nunarujussuup immamut kiviffigisimasaani misissuinerit Qalasersuup Danmarkimit pigineqartutut isigineqalernissaanut iluaqutaasinnaapput.
Qunnersuaq Afrikap kangiani avannaani Etiopia, Eritrea Djiboutilu aqqusaarlugit 60 kilometerinik takissusilik. 10 kilometerini itissisulik 8 meterinillu silissusilik - nunap sananeqaataasa qanoq ineriartorsinnaanerannik paasissutissanik nutaanik tunniussisinnaavoq, Danmarkillu Qalasersuarmik piginnittuujuaneranut iluaqutaasinnaalluni.
Ingeniøren taamma allappoq.
Afrikap ilaani tamaani nunarsuup sananeqaataasa ilaat arlallit aporaattuartarsimangaaramik saaligaluttuinnarsimapput kiisalu qulluulersimallutik. Qunnerillu tamakkua atuarlugit anngaq issorsimanngitsoq qaffakaarusaartuarsimavoq taamalu immap naqqanik nutaamik nunalluunniit qaavanik nutaamik pilersitsisimalluni.
Nunap ilaa tamanna massakkut immap qaavaniit 100 meterinik itinerusumiippoq. Kalaallit Nunaata avannaarpiarsuata ilaa aamma taamatut immamut morsussimagunarpoq. Kalaallit Nunaata ilaa tamanna takuneqarsinnaajunnaarsimavoq, sulili tamaaniilluni Kalaallit Nunaatalu imavimmut itiseriarneranut ilaalluni.
Tamanna uppernarsarneqarsinnaappat qallunaat naalagaaffiata naalagaaffeqatigiiffiup killeqarfiata avannarparneqarnissaa piumasarisinnaavaa, immamut kivisimasoq Kalaallit Nunaannut ilaasussanngortillugu, taamalu Qalasersuaq Avannarleq ilanngunneqartussanngortillugu. Taamalu gasseqarfissuit uuliaqarfissuillu tamaaniissorineqartut pigineqartussanngussapput.
Danmarki Savalimmiut Kalaallit Nunaallu peqatigalugit Kontinentalsokkelprojektimik pilersitsisimavoq, tassanilu 150 millioner kronit tunuliaqutaralugit Danmarkip siunissami killeqarfissaata sumiinnissaa isumaliutersuutigineqassaaq. Suliniuteqarnermi ilisimatuutut paasissutissanik assigiinngitsunik katersuisoqarersimavoq, taakkulu iluaqutigalugit Qalasersuup Danmarkimut atasuunera uppernarsarneqassaaq.
FN-imi suleqatigiissitaq ilisimatuunik 21-nik ilaasortalik nunap imavimmut itiseriarnerata killingata sumiinneranik aalajangiisuusussaavoq. Danmark 2014-ip tungaanut ilisimatuutut paasissutissanik tunngavilersuutissanik katersuinissaminut piffissaqarpoq, Ruslandili, aamma Qalasersuarmik piginnittuujumasoq, 2011-ip tungaanut piffissaqarluni.