´Ittuk´-kut iluarsaanneqarput
Sapaatip akunnerata naanerani Royal Arctic Bygdeservicep umiarsuaasa maskiinalerivianni piffissarujussuaq atorneqassaaq. Umiarsuit marluk misissoqqissaarneqassapput.
'Angaju Ittuk´, Nuup, Maniitsup Sisimiullu nunaqarfiini angalasartoq ajornartoornermi generatoriminik ajornartorsiuteqarpoq. Taamaattumik arfininngornermi Nuup Kapisillilu akornanni umiarsuaassineq umiarsuarmik attartukkamik pissaaq.
Taamatut paasissutissiivoq Royal Arctic Bygdeservice.
Generatorip atortua atorsinnaanngitsoq kingoraartissamaatimik nutaamik taarserneqarsinnaanngilaq. Umiarsuarni nunaqarfinnik pilersuisuni atortut taamatut pisoqaatigisut tunisassiarineqartarunnaarsimapput, taamaattumillu umiarsuarnut immikkut ittunik sanasoqassalluni.
Ilimanarporli Angaju Ittuk sapaatip akunnerata tulliani ilaasoqarluni angallasseqqissinnaalissasoq. Ajoraluartumik tunuliaquttamik Royal Arctic Bygdeservicemut ajornartorsiuteqanngitsuunngitsumik.
Matumani umiarsuaq nunaqarfinnik pilersuisoq alla ´Anguteq Ittuk´ sivisujaamik atorneqassanngilaq, paasineqarsimammat umiarsuaq oqoqartoq imatut annertutigisumik, umiartortut peqqissusaannik eqquisinnaalluni. Taamaattumik Anguteq Ittuk iluarsaanneqassaaq. Suli ilisimaneqanngilaq iluarsaannera qanoq akeqassanersoq, Royal Arctic Bygdeservicemulli akisungaatsiassaaq.
Aamma suli ilisimaneqanngilaq qanoq sivisutigisumik iliuarsaanneqassanersut, Anguteq Ittuk-lli sivisujaamik uninngassaaq. Taamaattumik Angaju Ittuup iluarsaannissaanut Anguteq Ittuup kingoraartissamaatai atorneqassapput, taamaasillunilu Royal Arctic Bygdeservicep naatsorsuutigaa Angaju Ittuk ataasinngorpamiit nalinginnaasumik angalalissasoq.
Suliassartaali annertujaartoq, naatsorsuutigineqartutullu iluarsaannera ulluni aggersuni naammassineqarsinnaassanngippt Royal Arctic Bygdeservice umiarsuarmik allamik attartortariaqassaaq, taamalu selskabip aningaasaqarniarnera ajornartorsioreersoq eqqorneqassaaq.
- Neriuppugut nutaanik umiarsualiornissamik pilersaarutivut kingunerissagaat ungasissorsuunngitsukkut umiarsuarnik nutaanik angallassisalerumaartugut, pissutsinik allaanerulluinnartunik nutaaliaanerusumnillu atugassaqarfiusunik aalajaannerusumillu angalasartussanik, Royal Arctic Bygdeservice ajuusaarluni oqarpoq.