Tele sermersoornernit ajornartorsiortinneqarpoq
Aallakaatitsinerit akornutillit tv-illu assiliartaa tarrartalik aallakaatitat siammarterneqartarfiisa sermersoornerinik pissuteqarput. Telemut sermersoornerit unamminartorsiortitsipput, soorlu Nuup eqqaani Qingaami.
Kalaallit Nunaanni attaveqaatitigut ingerlatsineq ilaatigut unamminartorujussuusarpoq. Kapisilinnut attaveqaateqartitsisoq inuttaqanngitsoq "QING" teknikerinit marlunnik alakkarneqarmat Tele Greenland unamminartumik naapitseqqippoq.
Siammarterisoq sermersimaqaaq sermiiaanerinnarlu suleqataasunut atortunullu ulorianartorsiortitsisinnaavoq. Taamaammat Tele Greenlandip eqqarsaatigiuaannarpaa sermiiaanermi atortorissaarutit attaveqaatit qanoq issusiannut akornusiinnginnissaat.
DMI ilisimatitsivoq suut qaavini sermersimanerit - uani napparutit - pinngortartut issilaartillugu kiisalu isugutammik qanorluunniit ittumik takkuttoqarsimatillugu.
Pujoq, aput masattoq imaluunniit sialuk nillertoq aamma taaneqartartoq nilakkarneq sermersoornermik pilersitsisarput. Aput masattoq pujorluunniit napparutit qaavini qaqortumik qalliisarpoq, nilakkarnerli sikutulli erseqqitsigaaq.
Napparutit sermersimatillugit radiop TV-ikkullu aallakaatitai akornusertarput, TV-ikkut isiginnaakkat tarranittarlutik soorlu maannakkut Kapisilinni tamanna misigineqartartoq.
Sermersoornerup kingorna Nuup Kangerluani GSM akoornuteqallattaavoq aamma.