2010-mi oqaatsinut politikkeqarlernissaa piviusorsiunngilaq
Nuka Møller Oqaasileriffimmi atorfilik oqaatsit pillugu ungasinnerusoq isigalugu pilersaarusiortoqarnissaanik kissaateqarpoq. Taanna sapaami IA-mi inuusuttut oqaatsit pillugit oqallitsitsimmata peqataavoq.
– Naak pilersaarutit? Naak anguniakkat? Sumununa ingerlaniartoqartoq? Oqaatsit pillugit oqallinnermi tamakku maqaasisama ilagaat, Nuka Møller Oqaasileriffimmit knr.gl-imut oqarpoq.
Sapaammi IA-p inuusuttai Katuami oqaatsit pillugit oqallititsinermi peqataasoq oqaluttuarpoq, 2001-imi oqaatsit pillugit suleqatigiissitaliortoqarpoq.
– Nalunaarusiami allassimavoq oqaatsit pillugit inatsit pingaarnerunngitsoq, taamaattoqli kalaallit oqaasiisa atuartitsinermi suliffeqarfinnilu atorneqarnerisa pitsanngorsarnissaat sulissutigineqartariaqartoq. Inuiaqatigiinni nutaaliaasuni kalaallit oqaasiisa atorneqarnissaat qulakkeerniarlugu oqaatsinik nassaartuillutalu sulissaagut, nassuiaavoq.
Nuka Møller isumaqarpoq piviusorsiortumik oqaatsinut politikkiliornissamut piffissaqanngitsoq inatsisartut upernaanerani saqqummiunneqartussamik. Illuatungaatigut isumaqarpoq kultureqarnermut naalakkersuisoq Mimi Karlsen oqaatsit pillugit nalunaarusiaq 2001 tunaartaralugu sulisariaqartoq.
– Oqaatsit oqallisigineqarnerat aallaqqaataanit aallarteqqippoq, Nuka Møller knr.gl-imut oqarpoq.