Siunissami utoqqaat amerlissapput

Kalaallit Nunaanni naatsorsueqqissaartarfiup inuit amerlassusaat siumoortumik kisitsisitalersorpaat. Tamatuma paasinarsisippaa Kalaallit Nunaanni innuttaasut utoqqaanerulissasut siunissamilu inuusuttut ikinnerulissasut.

Kalaallit Nunaanni siunissami inuusuttut ikinnerussapput utoqqaallu amerlallutik. Assi: Leiff Josefsen

Kalaallit Nunaanni innuttaasut amerliartorput utoqqaaneruleraluttuinnarlutillu.

Tamanna Kalaallit Nunaanni naatsorsueqqissaartarfiup kisitsineranit takuneqarsinnaavoq.

Ukiut 30-t qaangiuppata, 2040-mi 65-inik amerlanernilluunniit ukiullit 2009-mit marloriaammik amerlassuseqassapput.

Meeqqat inuusuttullu piffissami taasami 14 procentinik ikinnerussapput. Innuttaasullu sulisinnaassuseqartut maannamit 2040-mi procentinik tallimanik ikinnerussapput.

Siumut kisitsisitalersuineq ilimasaarutaanngilaq, natsorsueqqissaartarfik erseqqissaavoq.

Siumut kisitsisitalersuinermi kisitsisit ilisimasat kiseqqinneqartarput qanoq ineriartorsinnaaneri takujumallugit.

Siumut kisitsinermi kisitsisit allat avataanit takkuttut annerusumik minnerusumilluunniit inerniliussassamut sunniuteqarsinnaapput, pingaartumik nunamit qimatsisut nunamullu pisut eqqarsaatigissagaanni, Kalaallit Nunaanni naatsorsueqqissaartarfik allappoq.

Powered by Labrador CMS