Ilagiit silap pissusianut iliuuseqarnerat piumasaarsorneruvoq
Upperisarsiorneq politikkilu avissaangatinneqasapput, adjunki isumaliutersuummi allappoq.
Ilaatigut Kalaallit Nunaata biskoppiata Danmarkimi biskoppit peqatigalugit neriuutigippagu decembarip 13-ianni Københavnimi silap pissusia pillugu ataatsimeersuarnermut atatillugu oqaluffiit siarngi sianertinneqassasut, tamanna naturfilosofi-mi adj. professorip Jens Morgen Hansenip taavaa ilagiit najummatsernerattut.
Taamatut taanna allappoq jp.dk-mi isumaliutersuummi.
- Silap pissusia pilugu isumaqatigiissuteqarnissaq isumaqatigilluinnarpara, paqumigaarali tamatumani ataasiinnarmik kukkuneqanngitsumik isumaqartoqassappat. Silalli pissusia pillugu oqaluffiit siarnginik sianertitsiniarneq pinngortitamut ilisimatusarnermut najummatsipalaarneruvoq, Jens Morten Hansen allappoq nangillunilu;
- Politikkikkut oqaaseqartartut ukiuni kingullerni siunnersuutigisimavaat uagut, USA-tulli, ulluinnarni politikkikkut aalajangiinerni Guuti ilannguttassagipput. Tamanna aallartippoq professor Ole Wæverip 2005-imi Københavns Universitetip ukiumoortumik nalliuttorsiornerani oqalugiaataanik taakkartorneqartorujussuarmik. Ukiullu marlussuit matuma siornatigut, Konstantinopelimi patriarki Københavnip biskoppia peqatigalugu Kalaallit Nunaaliarmat sermersuup ataannarnissaa qinnukkiartorlugu.
- Qanittukkut aviisimi Poliiken-imi tusagassiortup Brian Patrick McGuire-p isumaliutersuutaani ilagiit piumasaarsornissaanik siunnersuut taamaattoq takuneqarsinnaavoq, taanna isumaqarami amerikarmiut præsidentiisut Guuti qilaallu pilluarnartui atugarilissagivut. Tamakkuli soorlu naammanngitsut ilagiit sinniisaasa, palasit biskoppillu ilarparujussuisa maanna siunnersuutigaat Københavnimi ataatsimeersuarnerup nalaani oqaluffiit siarngi sianertissagivut.
- Ilagiit naalagaaffimmit tapersersorneqartut politikkiunngitsutut tunngaveqarneranik sussaanngitsumik kipititsiniarneruvoq. Uagut europap avannaamiut, minnerunngitsumik uagut qallunaat, pissutissaqarluarluta upperisaq politikkilu avissaangatinniarsimavagut...
Isumaliutersuut tamarmi atuarneqarsinnaavoq uani jp.dk.