Nunatta pisariaqartippaatit

Suliffeqarfippaaluit peqaapput suliffissanik nuisitsinerni Københavnimi Århusimilu ingerlanneqartuni. Tassani siunertaavoq ilinniartut naammassippata sulisussatut pissarsiarinissaat.

Suliffissanik nuisitsinermi pingaartumik sammineqarput peqqissaasut, inatsisilerituut aningaasarsiornermillu ilisimasallit. Ass. Leiff Josefsen

Suliffeqarfiit nunatsinneersut 20-t sinnillit peqataapput suliffissanik nuisitsinermi, tamannalu ukiut arlallit kinguliit ingerlanneqartarpoq. Tamanna Københavnimi arfininngornermi ingerlanneqareeruni sapaammi Århusimi ingerlanneqassaaq.

Pingaarnertut siunertaraa kalaallit suliffeqarfiisa akornanni attaveqatigiinnermik pilersitsinissaq, aamma kalaallinik Danmarkimi atuartunik kiisalu Danmarkimi Kalaallit Nunaannilu atuarnerminnik naammassisimasunik attaveqalernissaq. Ukiormannalu ilaanermi immikkut ittumik neriuttoqarpoq.

– Ukioq manna 'aningaasarsiornerup ajutoorsimanera' pissutigalugu soqutiginnittunik amerlanernik ornigarneqarnissarput naatsorsuutigaarput, HR-konsulent Sebastian Bach Hansen oqarpoq.

– Taamaattumik pingaaruteqarpoq nunarput sapinngisamik pitsaanerpaamik ilisaritissallugu, takkuttunillu ajunngitsumik oqaloqateqarnissaq. Ukiormannattaaq pingaartumik peqqissaasunik, inatsisilerituunik aningaasarsiornermillu ilisimasalinnik naapitaqarusuppugut, allarpassuarnullu allatut ilinniarsimasunut aamma suliffissarpassuaqarpoq. Tassa takkutiinnartariaqassapput, Sebastian Bach Hansen oqarpoq.

Namminersornermut ikaarsaarneq pillugu aamma oqalugiartoqassaaq.

– Namminersornerup eqqunneqarnera aallaavigalugu Kalaallit Nunaata siunissaa pillugu ukioq manna oqalugiartoqassaaq, tassani Kalaallit Nunaata namminersuleriartornera eqqarsaatigalugu pilersaarutit tusarnaartunit apeqqutigineqarsinnaassapput, taama nassuiaavoq ataqatigiissaarisoq Laila Møller Josefsen.

– Oqalugiarnermi tassani kalaallit qallunaallu takutikkusuppagut Kalaallit Nunaanni siunissami allannguutinik sunik atugaqarumaarnersut, oqarpoq.

Powered by Labrador CMS