Influenza A-mik nualluttut pingasuupput
Nakorsaaneqarfik nalunaarpoq inuit pingasut nualluummik A-mik tunillanneqarsimasut.
Napparsimasut marluk influenza A-mik (H1N1-virusimik) tunillaneqarimagunartut Tasiilamiipput, Sisimiunilu ataaseq influenza A-mik tunillanneqarsimavoq.
Sisimiuni inuppassuit nuallupput, nakorsaaneqarfimmit nalunaarput.
– Sisimiuni inuppassuit napparsimallutik uninngapput. Tamatuma kingunerisaanik napparsimavimmi aamma uninngasoqarpoq. Uninngasuutitsinnit ataaseq toquvoq, immaqa influenza A-mik, kisiannili suli uppernarsaatissaqanngilagut napparsimavimmi misissugassamik tigusisoqarsimanngimmat, nakorsaaneqarfimmit Flemming Kleist Stenz oqarpoq.
Nappat sakkukitsoq
Peqqinnissaqarfimmik aqutsisoqarfimmit nalunaarutigineqarpoq nualluut sakkukitsunnguusoq ullullu 3-5 qaangiukkaangata nappaat malunnarunnaartartoq, taamaattumik napparsimavimmut saaffiginninnissaq pisariaqarneq ajortoq. Taamaattoq napparsimasoq ullut 5-7-nik sivisunerusumik napparsimappat imaluunniit allatigut ajornartorsiorpat, soorlu puakkut nipititsilluni, taava pinngitsoorani peqqinnissaqarfik saaffigineqartariaqartoq.
Meeqqat napparsimatillugit maluginiartariaavoq nerillutillu imertarnersut.
Nakorsaanerup aamma innersuussutigaa innuttaasut tunillatsinnermi ulorianartorsiorsinnaasut, soorlu pualluttut imaluunniit sukkortut suli kapitissimanngitsut peqqinnissaqarfimmut saaffiginneqqullugit.