Innarluutillit sumiginnarneqarput
Ulloq unnuarlu angerlarsimaffinni sulisussaaleqineq pissutigalugu innarluutillit tamakkiisumik sullinneqarsinnaanngillat. PIP taama isumaqartoq aningaasanik amerlanernik ujaasivoq.
Kommunit innarluutillit immikkoortortaannut atugassiissutiminnik ilanngartuinerat pissutigalugu ulloq unnuarlu paaqqinnittarfiit inuttassaaleqipput. Innarluutillit ilaatigut namminneq paarisariaqartarput soorlu sulisut napparsimallutik suliartunngitsillugit perorsaasut ilinniarsimasut peqatigiiffiannit PIP-mit tamanna sakkortuumik isornartorsiorneqarpoq, knr.gl allappoq.
– Innuttaasoqatigut taama pisinnaanngilagut, siulittaasoq Kaaliina Skifte radioavisimut oqarpoq.
Taassuma aningaasat innarluutilinnut atugassiissutigineqartussat amerlanerit ujartorpaat minnerunngitsumik ilinniartitseqqiffissanut amerlanernik aningaasaliisoqarnissa ujartorlugu.
Perorsaasunik 300 missaannik amigaateqarpugut, tamatuma ilaatigut kinguneraa innarluutilinni sulisut amerlanerpaat ilinniarsimanngitsuuneri.