Piumalleruit poortukkanik nassiussigit
POST-ip nammineq nassitsiviit illoqarfinni postboksit ammanerisa nalaanni atorneqarsinnaasut ikkussuuppai, atuisut allakkeriviit ammasarfiisa nalinginnaasut avataasigut nassitsisinnaanngorlugit.
Automati siulleq Nuummi sisamanngornermi 29-ni atorneqalissaaq, tamannalu pissutigalugu TELE-POST kaffillerniarpoq kaagillerlunilu, soorlumi aamma sulisut maskinap nutaap eqqaaniikkumaartut ikiuunnissaminnut piareersimallutik. Atuisugut aammattaaq periarfissaqassapput koorip 800,00 kruuninik nalilinnik imallip unammissutigineranut peqataanissaminnut.
– Nassitsivitsigut allakkat poortukkallu – nalinginnaasut tammatsaalisallu – nassiunneqarsinnaapput, aammalu frimærkissat pisiarineqarsinnaassapput. Taamaalillutit TELE-POST Centerip nalinginnaasumik ammaffiata nalaani tassunngartariaarupputit, illilli piffissaqarfikkut nassitsiartorsinnaallutit, allakkerivimmi pisortaaneq Per Svendsen oqarpoq.
Atuisup nassiunniakkani oqimaalutamut iliinnassavaa, taavalu Allagaq imaluunniit Poortugaq toorlugu. Paasissutissiinitit aallaavigalugit automatip aki naatsorsussavaa, illillu aningaasat taakku nalingata asserpiaanik frimærkisisinnaalissaatit. Automatip atuisup allakkamik poortukkamillu nassiussiniarnera pisariillisarpaa akisunaarnagu akikinaarnagulu. Automatini Akiliut aamma Visa Dankort akiliutigineqarsinnaapput.
Automatit igalaajusaqarput qanoq iliornissatit tulleriiaaqqissaarlugit ilitsersuissutitalinnik. Igalaasaani oqaatsit assigiinngitsut pingasut arlaat toqqarneqarsinnaavoq, tassalu kalaallisut, qallunaatut aamma tuluttut oqaatsit. Taamaalillutik kikkut tamarmik aamma takornarat isumannaalluinnartumik nassitsivigut nutaat atorsinnaavaat.
– ”Neriuutigaarput atuisutta tamarmik automatitaagut atorluarumaaraat. Atuisutsinni tamanna iluatsilluassappat sullississut tamanna Kalaallit Nunaanni illoqarfinni amerlanerni atorsinnaasunngortikkumaarparput”, allakkerivimmut pisortaaneq Per Svendsen oqarpoq.
Piffissami qaninnermi Automatit Uummannami, Kangerlussuarmi Narsamilu atorneqarsinnaalissapput.